एजेन्सी । भारतका पूर्व ओपनर गौतम गम्भीरले रोहित शर्मा इन्डियन प्रिमियर लिग (आईपीएल) को उत्कृष्ट कप्तान रहेको बताएका छन् ।
गम्भीरले स्टार स्पोर्ट्ससँग कुरा गर्दै मुम्बई इन्डियन्सका कप्तान रोहित आईपीएलकै उत्कृष्ट कप्तान भएको बताएका हुन् ।
'मेरो विचारमा रोहित उत्कृष्ट कप्तान हुन् । उनले चार उपाधि जितेका छन् । कप्तानी भन्नु उपाधि जित्नु हो,' उनले भने।
रोहित आईपीएलमा सर्वाधिक सफल कप्तान मानिन्छ । उनले मुम्बईबाट चार सिजन उपाधि जितेका छन् ।
'उनी अहिलेको सबैभन्दा सफल आईपीएल कप्तान हुन् । उसले अहिलेनै ४ उपाधि जितिसकेका छन् । उनले ६-७ उपाधि जित्ने छन्,' गम्भीरले थपे ।
रोहितले सन् २०१३, १५, १७ र २०१९ को सिजन मुम्बईलाई च्याम्पियन बनाएका थिए ।
गम्भीर पनि आईपीएलमा सफल कप्तानको रुपमा रहेका छन् । उनले कोलकत्ता नाइट राइडर्सलाई दुई पटक उपाधि दिलाएका छन् ।
रोहितको कप्तानीमा मुम्बईले १ सय ४ खेलमा ६० खेल जितेको छ । रोहित आईपीएलमा सर्वाधिक रन बनाउने तेस्रो खेलाडी समेत हुन् ।
