काठमाडौं । कागेश्वरी मनोहरा यु–१६ सान कप टी– २० क्रिकेट प्रतियोगिताअन्तर्गत शुक्रबारलाई तय भएको कुनैपनि खेल वर्षका कारण हुन सकेन ।
उपल्लो मुलपानी क्रिकेट मैदानमा शुक्रबार सैनिक र केसीटीसी ‘बी’ तथा नेक्सस र आयोजक सान ‘रातो’ बीच खेल हुने तालिका थियो । दुवै खेल हुन नसकेपछि चारै टिमले १–१ अंक बाँडेका छन् ।
त्यससंगै सैनिक ३ अंकसाथ समूह ‘सी’ को विजेता बन्दै क्वाटरफाइनलमा पुग्यो । केसीटीसी ‘बी’ प्रतियोगिताबाट बाहिरियो भने समूह ‘सी’ बाट ग्रेट हिमालय उपविजेताका रुपमा क्वाटरफाइनलमा स्थान बनाउन सफल रह्यो ।
त्यस्तै नेक्सस र आयोजक सान ‘रातो’ समूह ‘डि’ बाट क्रमशः विजेता र उपविजेताका हैसियतले क्वाटरफाइनलमा पुगेका छन् ।
क्वाटरफाइनल केसीटीसी ‘ए’ र ग्रेट हिमालय, एन्जल्स हर्ट र सैनिक, ओसिस् र सान ‘रातो’ तथा बालुवाटार क्रिकेट एकेडेमी र नेक्ससबीच हुनेछ ।
