एजेन्सी । पाहुना टोली दक्षिण अफ्रीकाविरुद्धको एक मात्र टी-ट्वान्टी क्रिकेटमा श्रीलंकाले जित निकालेको छ । मंगलबार राति कम स्कोर भएको खेलमा श्रीलंकाले दक्षिण अफ्रीकालाई ३ विकेटले हराएको हो ।
कोलम्बोस्थित प्रेमादासा क्रिकेट स्टेडियममा दक्षिण अफ्रिकाले दिएको ९९ रनको सामान्य लक्ष्य श्रीलंकाले १६ ओभरमा ७ विकेट गुमाएर पुरा गर्यो । श्रीलंकाको जितमा दिनेश चण्डीमालले अविजित ३६ रन बनाए ।
यस्तै धनन्जय डी सिल्भाले ३१ रन जोड्दा दसुन सनकाले १६ रन बनाए । दक्षिण अफ्रिकाका कागीसो राबडा,ताब्रेज शाम्सी र जुनियर डालाले समान २/२ विकेट लिए ।
यसअघि टस जितेर पहिले ब्याटिङ्ग गरेको दक्षिण अफ्रीका १६ ओभर ४ बलमा अलआउट हुँदै ९८ रनमा समेटिएको थियो । दक्षिण अफ्रीकाका कप्तान क्विनटन डी ककले २०, रिजा हेन्ड्रिक्सले १९ तथा हेन्रीच क्लासेनले १८ रन जोडे ।
दक्षिण अफ्रिकाको ब्याटिङ लाइन ध्वस्त बनाउन लक्षण संदाकनले ३ तथा अकिला धनन्जय र धनन्जय डी सिल्भाले समान २/२ विकेट लिए ।
योसंगै श्रीलंकाले भ्रमणकारी टोली दक्षिण अफ्रीकाविरुद्धको एक खेलको टी-ट्वान्टी सिरिजमा कब्जा जमाएको छ ।
यसअघि श्रीलंकाले पाँच खेलको एकदिवसीय सिरिज भने ३-२ ले गुमाएको थियो । त्यसअघि दुई खेलको टेष्ट भने श्रीलंकाले आफ्नो बनाएको थियो ।
