काठमाडौं । विश्वकप छनोटको रुपमा रहेको आईसीसी विश्वकप क्रिकेट लिग–२ अन्तर्गत अहिले अमेरिका र ओमानबीच प्रतिस्पर्धा भईरहेको छ ।
कीर्तिपुरस्थित टियु क्रिकेट मैदानमा अमेरिकाविरुद्ध ओमानले ब्याटिङ गरिरहेको छ । र, अमेरिकाविरुद्ध ओमानका कप्तान जिशन मक्सुद र अकिब इल्यासले शतक बनाएका छन् ।
मक्सुदले १ सय ३ बलमा १० चौका र ३ छक्का प्रहार गरे । उनको यो पहिलो एकदिवसीय अन्तर्राष्ट्रिय शतक हो । उनले नेपालविरुद्ध अर्धशतक बनाएका थिए ।
मक्सुद १०९ रनमा आउट भए ।
यस्तै अकिबले १ सय १८ बलमा ११ चौका र १ छक्कासहित शतक पुरा गरे । उनले लगातार दोस्रो खेलमा शतक बनाएका हुन् । उनले यस अघि नेपालसँगको खेलमा पनि शतक बनाएका थिए ।
