एजेन्सी । आईसीसी यू-१९ विश्वकप क्रिकेटको टिम अफ दि टुर्नामेन्ट सार्वजनिक भएको छ ।
दक्षिण अफ्रिकामा आइतबार सकिएको प्रतियोगिताको टिम अफ दि टुर्नामेन्ट सोमबार सार्वजनिक भएको हो ।
अन्तर्राष्ट्रिय क्रिकेट परिषद (आईसीसी) ले बंगलादेशका अकबर अलीको कप्तानीमा प्रतियोगिताको टिम अफ दि टुर्नामेन्ट सार्वजनिक गरेको हो ।
टिममा बंगलादेशबाट कप्तान अलीसहित हसन जोय, शाहदत होसेन रहदा भारतका यासभी जैसवाल, रबि बिश्नोई र कार्तिक त्यागी रहेका छन् । यस्तै अफगानिस्तानका इब्राहिम जाड्रन, शफिकउल्लाह घाफरी, वेष्ट इण्डिजका जयडेन सालेस, नईम योङ र श्रीलंकाका रभिन्दु रासंथा रहेका छन् । टिमको १२ औं खेलाडीमा क्यानडाका अकिल कुमार रहेका छन् ।
विश्वकपको उपाधि भने बंगलादेशले जितेको थियो । आइतबार भएको फाइनलमा भारतलाई हराएर बंगलादेशले पहिलो पटक यू-१९ विश्वकपको उपाधि जितेको थियो ।
