एजेन्सी । नेपाली लेग स्पिनर सन्दीप लामिछाने रहेको मेलबर्न स्टार्सले बिग बास लिग (बीबीएल) क्रिकेटमा आज शुक्रबार मेलबर्न रेनेगेड्ससँग खेल्दैछ ।
डकल्याण्डमा हुने मेलबर्न र रेनेगेड्सबीचको खेल नेपाली समय अनुसार अपरान्ह १:५५ मा सुरु हुनेछ । लिगको पुछारको टिमसँग मैदान उत्रदा मेलबर्न सातौं जितको खोजीमा हुनेछ ।
मेलबर्न ७ खेलमा ६ जितसहित १२ अंक जोडेको शीर्ष स्थानमा रहेको छ । रेनेगेड्सविरुद्ध जित निकाल्दै मेलबर्न उक्त जितको लय कायम राख्न चाहन्छ ।
अघिल्ला ७ खेलमा पराजय ब्यहोरेको रेनेगेड्स पहिलो जितको खोजीमा हुनेछ ।
रेनेगेड्सविरुद्ध सन्दीप प्लेईङ सेटमा पर्ने सम्भावना बलियो रहेको छ । किनकी सन्दीपले यस सिजन चोटका कारण एक खेल बाहेक अन्य सबै खेलमा मैदान उत्रने मौका पाएका छन् ।
रेनेगेड्ससँग खेल्ने १३ सदस्सीय टिममा सन्दीप परिसकेका छन् । यस सिजन सन्दीपले ६ खेलमा ६ विकेट हात पारिसकेका छन् ।
