काठमाडौं । नेपाली लेग स्पिनर सन्दीप लामिछाने अष्ट्रेलियामा जारी बिग बास लिग (बीबीएल) क्रिकेट मेलबर्न स्टार्सबाट खेलिरहेका छन् ।
सन्दीपको टिम मेलबर्नले बुधबार भएको खेलमा सिड्नी थन्डरलाई ६ विकेटले पराजित गरेको छ । तर, सन्दीप विकेट लिन असफल भए ।
सन्दीपले ४ ओभरमा ३९ रन खर्चिए पनि विकेट लिन सकेनन् ।
सिड्नीविरुद्ध विकेट लिन असफल भएपनि सन्दीप चर्चामा रहे । सन्दीप चर्चामा रहनु कारण उनले लगाएको जुत्ता र जुत्तामा लेखिएको सन्देश थियो ।
सिड्नीविरुद्धको खेलमा सन्दीपले लगाएको जुत्तामा अष्ट्रेलिया आगलागीको लागि सहयोग र नेपालको भ्रमण वर्षको अभियानलाई समर्थनसहितको सन्देश लेखिएको थियो ।
सन्दीपले लगाएको एउटा जुत्तामा ‘नेपाल भ्रमण वर्ष २०२०’ लेखिएको छ । यस्तै अर्को जुत्तामा ‘बुशफायर हिरोज’ लेखेर नमस्ते गरेका छन् ।
नेपालले जनवरी १ बाट भ्रमण वर्ष मनाईरहेको छ । र, नेपालले सन् २०२० मा २० लाख पर्यटन ल्याउने योजना बनाएको छ ।
यस्तै अष्ट्रेलियामा भईरहेको भिषण आगलागीको कारण हजारौ मानिस विस्थापित भएका छन् भने लाखौ जीव जन्तुको ज्यान गएको छ ।
