पोखरा । बुटवल ब्लास्टर्सले दोस्रो संस्करणको पोखरा प्रिमियर लिग क्रिकेट (पीपीएल) टी-ट्वान्टी क्रिकेटमा दोस्रो जित निकालेको छ ।
पोखरामा शुक्रबार साविक विजेता पोखरा पल्टनलाई ८ विकेटले पराजित गर्दै बुटवलले दोस्रो जित निकालेको हो ।
पोखरा रंगशालामा घरेलु टोलीले दिएको १ सय २२ रनको लक्ष्य बुटवलले १४ ओभरमा मात्र २ विकेट गुमाएर पुरा गर्यो ।
बुटवलको जितमा अफ्ताबुद्दीन अहमेदले ७५ रनको अर्धशतकीय इनिङ्स खेले । यस्तै शंकर रानाले १९ तथा भीम सार्कीले अविजित १६ रन बनाए ।
पोखराका रशिद खान र प्रथामेस डाकेले १/१ विकेट लिए ।
यस अघि टस हारेर पहिले ब्याटिङ गरेको पोखराले २० ओभरमा ५ विकेट गुमाएर १ सय २१ रन बनाएको थियो ।
पोखराका लागि रबि इन्दर सिंहले अविजित ४५ रन बनाए । प्रथामेस डाकेले अविजित २० रन जोड्दा रोहित कुमार पौडेलले १९ रन बनाए । इशान पाण्डेले १३ रन जोडे । बुटवलका हर्स टोकले २ विकेट लिए ।
जितसँगै बुटवल ३ खेलमा ४ अंक जोडेर तालिकाको दोस्रो स्थानमा उक्लिएको छ ।
पोखराको यो लगातार तेस्रो हार हो । पोखरा ४ खेलमा २ अंक जोडेर पाँचौं स्थानमा रहेको छ ।
