पोखरा । लामो समयदेखि नेपाली क्रिकेट टिममा देखिएको समस्या ब्याटिङ हो । त्यसमा पनि ओपनिङ । क्रिकेटमा ओपनिङ साझेदारी महत्वपूर्ण हुन्छ । जब ओपनरले राम्रो सुरुवात दिलाउछन्, तब टिमको स्कोर बलियो बन्ने सम्भाबना रहन्छ ।
नेपालको राष्ट्रिय टिममा ओपनिङ गर्ने खेलाडीमा निरन्तरता देखिएको छैन । खास गरि सन् २०१४ को टी–ट्वान्टी विश्वकप पछाडी ।
नेपालले दिलिप नाथ, सुनील धमला, राजु रिजाल, अनिल शाह, पवन सर्राफ, प्रदिप ऐरी, इशान पाण्डे लगायतका खेलाडीलाई ओपनरको रुपमा प्रयोग गरिसकेको छ । तर अधिकांश खेलाडी प्रभाब देखाउन असफल देखिएका छन् ।
हाल नेपालको ओपनिङमा कप्तान ज्ञानेन्द्र मल्ल र पुर्व कप्तान पारस खड्का देखिने गर्छन् । अन्तराष्ट्रिय खेलमा ओपनिङ गरेपनि दुवै खेलाडी घरेलु क्रिकेटमा ओपनिङ गरेको खासै देखिदैन ।
हुन त राष्ट्रका लागि खेल्नु र कुनै फ्रेन्चाइज क्रिकेट खेल्नु भिन्न कुरा हो ।
कुनै पनि खेलाडीले राष्ट्रबाट खेल्दा नियमति एक स्थानबाट खेल्छ । फ्रेन्चाईजमा सायदै त्यो देखिन्छ । र विश्व क्रिकेटमा यो खासै नौलो बिषय समेत हैन ।
तर नेपालको स्थिती फरक छ । घरेलु प्रतियोगिताको आधारमा खेलाडीले राष्ट्रिय टिम सम्हाल्नु परेको छ । सोही कारण राष्ट्रिय टिमका खेलाडीले एकै स्थानमा आफुलाई अभ्यस्त बनाउँदा सकारात्मक प्रभाव पर्ने खेल प्रशंसकहरु बताउने गर्छन् ।
घरेलु क्रिकेटमा चर्चित फ्रेन्चाईज पोखरा प्रिमियर लिग आईतबार सुरु भयो । उद्घाटन खेलमा ज्ञानेन्द्र मल्ल कप्तानीको काठमाडौंले साविक विजेता पोखरा पल्टनसंग ९ विकेटको हार ब्यहोर्यो ।
टस हारेर पहिले ब्याटिङ गरेको काठमाडौंले निर्धारित ओभरमा ८ विकेट गुमाएर १ सय १५ रन मात्र बनायो । र लक्ष्य पछ्याएको पोखराले १ विकेट गुमाएर लक्ष्य सहजै भेट्टायो ।
तर राष्ट्रिय टिममा ओपनरको भूमिकामा देखिन थालेका नवनियुक्त कप्तान ज्ञानेन्द्रले काठमाडौँका लागि ओपनिङ गरेनन् ।
काठमाडौंको लागि ओपनरद्वय जयकिशन कोल्सवाला र नेपालका पुर्व ओपनर सुबास खकुरेलले इनिङ्स सुरुवात गरेका थिए । उनीहरुले १६ बल अर्थात २ ओभर ४ बलमा १८ रनको साझेदारी गरे ।
खेल सकिएपछि पत्रकारले कप्तान ज्ञानेन्द्रलाई ओपनिङ नगर्नुको कारण सोधेका थिए ।
‘टिमको समिश्रण हेरेर खेलाडीको स्थान निर्धारण हुन्छ । अहिलेको लागि टिममा वास्तवमै राम्रा ओपनर (कोल्सावाला र खकुरेल) भएका कारण फस्ट डाउन आएको हुँ ।’ ज्ञानेन्द्रले भने ।
सुबास राष्ट्रिय टिमका पुर्व ओपनर हुन । उनले नेपालको लागि निरन्तर ओपनिङ गर्दै आएका थिए । तर घुँडाको चोटका कारण सुबास लामो समयदेखि क्रिकेट बाहिर रहे ।
हाल उनी पीपीएलमार्फत घरेलु क्रिकेटमा फर्किएका छन् । उनको लक्ष्य भनेको पुन राष्ट्रिय टिममा स्थान बनाउनु हो ।
यस्तै कोल्सावाला गत संस्करण आफ्नो टिमका लागि सर्वाधिक रन बनाउने तेस्रो खेलाडी हुन् । उनले ६ खेलमा १ सय १९ रन बनाएका थिए ।
पहिलो दिन कोल्सावालाले २ चौकाको मद्दतमा ६ बल खेल्दै ९ रन बनाए । यस्तै अर्का ओपनर सुबासले १२ बलमा १ चौका सहित ६ रन बनाए ।
