काठमाडौं । घरेलु टोली नेदरल्याण्डविरुद्धको दोस्रो एकदिवसीय क्रिकेटमा नेपालले जित हात पारेको छ । शुक्रबार भएको रोमान्चक खेलमा नेपालले नेदरल्याण्डलाई १ रनले हराएको हो ।
भिआरए मैदानमा नेपाले दिएको २१७ रनको लक्ष्यसहित जवाफी ब्याटिङ गरेको नेदरल्याण्ड पुरै ५० ओभरमा अलआउट हुँदै २१५ रनमा समेटियो । योसंगै नेपालले नेदरल्याण्डविरुद्धको दुई खेलको एकदिवसीय सिरिज १ - १ को बराबरी गरेको छ । यसअघि बुधबार भएको डेब्यु खेलमा नेपाल नेदरल्याण्डसंग ५५ रनले पराजित भएको थियो ।
दोस्रो खेलको जितसंगै नेपालले एकदिवसीय अन्तर्राष्ट्रिय क्रिकेटमा पहिलो जित हात पारेको छ । र, नेपालले एकदिवसीय क्रिकेटको डेब्यु सिरिजमा सुखद अन्त्य गरेको छ । तर, नेपाललाई जित निकाल्न अन्तिम बलसम्म कुर्नु परेको थियो ।
अन्तिम ओभरमा कप्तान पारस खड्का नायक बन्दा नेपालले जित हासिल गरेको हो । नेदरल्याण्डलाई अन्तिम ओभरमा जितका लागि ६ रन आवश्यक थियो । उसको १ विकेट हातमा थियो । कप्तान पारसको पहिलो बलमा क्लासेनले १ रन जोडे । दोस्रो बलमा रन नेदरल्याण्डले रन जोड्न सकेन । तेस्रो बलमा मीकेरनले १ रन जोडे । त्यसपछि चौथो बलमा क्लासेनले दुई रन जोड्दा नेदरल्याण्डलाई २ बलमा २ रन आवश्यक रह्यो ।
चौथो बलमा क्लासेनले रन जोड्न सकेन र अन्तिम बलमा नेदरल्याण्डलाई २ रन आवश्यक रह्यो । अन्तिम बलमा क्लासेनलाई पारसले रन आउट गराउदै नेपाललाई एकदिवसीय अन्तर्राष्ट्रियमा नेपाललाई पहिलो जित दिलाए ।
क्लासेनले १३ रन जोड्दा मीकेरनले अविजित १२ रन जोडे । यस्तै नेदरल्याण्डका वेस्ली बार्रेसीले ७१ रनको अर्धशतकीय पारी खेले । त्यसबाहेक उसका ड्यानियल टेर ब्राकले ३९, पिटर सिलारले २१ रन जोड्दा बेन कोपेरले १९ तथा शेन स्नाटरले १२ रन बनाए ।
नेपालका सन्दीप लामिछानेले ३ विकेट लिए । यस्तै ललित भण्डारीले २ विकेट लिदा कप्तान पारस खड्का, सोमपाल कामी, दिपेन्द्र सिंह ऐरी र बसन्त रेग्मीले १/१ विकेट लिए ।
यसअघि टस जितेर पहिले ब्याटिङ गरेको नेपालले ४८ ओभर ५ बलमा अलआउट हुँदै २१६ रन बनाएको थियो ।
नेपालको उच्च लक्ष्यमा कप्तान पारस खड्का र सोमपाल कामीले अर्धशतकीय पारी खेले । एकदिवसीय अन्तर्राष्ट्रिय क्रिकेटमा नेपालको लागि अर्धशतक बनाउने दोस्रो खेलाडी बनेका कप्तान पारसले ६९ बलमा ५१ रन जोडे ।
यस्तै अर्धशतक बनाउने तेस्रो नेपाली खेलाडी बनेका सोमपालले ४६ बलमा ६१ रनको अर्धशतकीय पारी खेले । निकै आक्रामक ब्याटिङ गरेका उनले पाँच चौका र ६ छक्का प्रहार गरे ।
त्यस्तै नेपालका लागि सुबास खकुरेल र दिपेन्द्र सिह ऐरीले समान १९/१९ रन जोड्दा आरिफ शेख १६ तथा ज्ञानेन्द्र मल्ल १३ रनमा आउट भए । नेपालका सन्दीप लामिछाने ८, रोहित कुमार पौडेल ६, अनिल साह ४ रनमा आउट हुँदा ललित भण्डारी ४ रनमा अविजित रहे ।
नेदरल्याण्डका फ्रेड क्लासेनले ३ तथा माइकल रिप्पोन र पिटर सीलरले २/२ विकेट लिए ।
अन्तर्राष्ट्रिय क्रिकेट परिषद (आईसीसी) बाट एकदिवसीय राष्ट्रको मान्यता पाएपछि नेपाल दुई खेलको ऐतिहासिक एकदिवसीय सिरिज खेल्न नेदरल्याण्ड पुगेको हो ।
गत फेब्रुअरीमा जिम्बावेमा भएको विश्वकप छनोटबाट नेपालले एकदिवसीय अन्तर्राष्ट्रिय राष्ट्रको मान्यता पाएको थियो । छनोटमा एसोसिएटतर्फ उत्कृष्ट तीन टोलीमा रहेर नेपालले ऐतिहासिक सफलता पाएको थियो । चार बर्षको लागि नेपालले पाएको मान्यता यहीँ जुलाईबाट लागु भएको हो ।
नेपालले एसोसियट राष्ट्रको मान्यता पाएको २२ बर्षपछि एकदिवसीय राष्ट्रको मान्यता पाएको हो । सन् १९९६ मा एसोसियट राष्ट्रको मान्यता पाएको नेपाल सन् १९८८ मा आईसीसीको सदस्य बनेको थियो ।
नेपालले एकदिवसीय मान्यता पाएपछि नेदरल्याण्डले ऐतिहासिक क्षणको लागि आथित्यमा प्रदान गरेको हो ।
नेदरल्याण्डविरुद्धको यो दुई खेलको सिरिजपछि नेपालका भेट्रान स्पिनर शक्ति गौचनले सन्यास लिएका छन् ।
-1732845388.webp)
