काठमाडौं । ‘भगवानले सरापनै दिएको जस्तो लाग्छ ।’ सोमबार भारतसँग तेस्रो पटक सागको महिला फुटबलको फाइनलमा पराजित भएपछि गोलरक्षक एन्जिला तुम्बाप्पो सुब्बाले भनिन् ।
दक्षिण एसियाली खेदकुद् (साग) अन्तर्गत पोखरामा रंगशालामा भएको फाइनलमा नेपाल पुन भारतसँग पराजित हुन पुग्यो ।
भारतीय स्ट्राइकर बाला देबीले दुई गोल गरेपछि घरमै उपाधि राख्ने नेपालको सपना साकार हुन सकेन ।
राष्ट्रिय महिला फुटबल टिमकी नियमित गोलरक्षक एन्जिलाले राम्रो खेल्दा खेल्दै सधै भारतसँग पराजित हुँदा भगवानले नै सधै सराप दिएको अनुभव हुने बताईन् ।
‘सबैलाई पराजित गर्दै फाइनल पुग्छौं । राम्रो खेलकै हुन्छौं । खै के नपुगेको हो । बेला बेला त भगवानलेनै नजितोस् भनेर सरापनै दिए जस्तो लाग्छ ।’ पोखराबाट एन्जिलाले भनिन् ।
सन् २०१६ बाट राष्ट्रिय टिममा डेब्यु गरेकी एन्जिला त्यसपछि राष्ट्रिय टिमकी नियमित गोलरक्षक हुन् ।
भारतमा भएको सागमा श्रीलंकाविरुद्ध डेब्यु गरेयता उनी राष्ट्रिय टिममा नियमित छिन् ।
सन् २०१० ढाकाबाट सागमा प्रवेश पाएको महिला फुटबलले सन् २०१६ मा भारतको सिलोङ–गुहावटी तथा सन् २०१९ को काठमाडौं–पोखरा संस्करणको फाईनलमा भारतसंग खेलेको थियो ।
दक्षिण एसियामा अन्य देशलाई पराजित गरेपनि नेपालको सधै भारतको तगारो बन्ने गरेको छ ।
पाकिस्तान, भुटान र माल्दिभ्सले महिला फुटबल नखेल्ने भएपछि प्रतियोगिता राउण्ड रोविन लिगको आधारमा खेलाईएको हो ।
लिग चरणमा श्रीलंका र माल्दिभ्सलाई हराएको नेपाल भारतसँग पराजित भएको थियो । फाईनलमा समेत नेपालले भारतको चुनौती पार गर्न सकेन ।
गोलरक्षक एन्जिला भारतसँग राम्रो खेल्दा खेल्दै सधै स्कोरमै समस्या आउने गरेको बताउँछिन् ।
‘पहिलो दिन भारतविरुद्ध धेरै राम्रो खेलेका थियौं । दबाबमा पनि राखेका थियौं । त्यो दिनपनि स्कोरमै समस्या रह्यो । फाइनलमा त कुनैपनि समय दबाब दिनै सकेनौं । फेरिपनि स्कोरमा समस्या रह्यो ।’ उनले भनिन् ।
‘मेहनत पनि गरेका छौं । खेल्न पनि खेलेका छौ । के भएको हो भन्ने अचम्म लाग्छ ।’ निराश हुँदै एन्जिलाले भनिन् ।
भारतसँग लगातार दोस्रो प्रतियोगितामा हार ब्यहोरेरपछि मुख्य प्रशिक्षक हरि खड्काले राजिनामा दिएका छन् ।
हारको सम्पुर्ण जिम्मेवारी आफुले लिने बताउँदै उनले नैतिकताका आधारमा प्रशिक्षकबाट राजिनामा दिएको बताएका छन् । यस्तै टिमकी कप्तान निरु थापा र डिफेन्डर मनमाया लिम्बुले पनि राष्ट्रिय टिमबाट सन्यास लिएका छन् ।
हरि खड्का टिमको प्रशिक्षक रुपमा आएपछि नेपाल चार प्रतियोगितामा उपविजेता रह्यो । खड्काको नेतृत्वमा नेपालले भारतमा भएको हिरो महिला गोल्डकप, विराटनगरमा भएको पाचौं संस्करणको साफ, किर्गीस्तानमा भएको नादेझ्दा कप र सागमा उपविजेता भयो ।
साग खेल्नु अघि खेलाडीले अन्तराष्ट्रिय मैत्रीपूर्ण खेलमा अभ्यास गर्न पाएनन् ।
गोलरक्षक एन्जिला समेत मैत्रीपूर्ण खेलको कमी हुँदा भारतसंग पराजित हुन पुगेको बताउँछिन् ।
‘उनीहरु धेरै मैत्रिपुर्ण खेलमा व्यस्त हुन्छन् । हामीलाई त्यो सुविधा छैन । साग अगाडि एउटा मात्रै प्रतियोगिता खेलियो । त्यसपछि मैत्रिपुर्ण खेल हुने भनिएपनि अन्तिम समयमा आएर भएन । साग जस्तो प्रतियोगिता अघि एउटै अभ्यास खेल भएन ।’ उनले भनिन् ।
