काडमाडौं ।
एक समय थियो ।
भुटानी फुटबल कमजोरको पर्याय थियो ।
दक्षिण एसियामा सबै भन्दा कमजोर टिम मानिन्थ्याे ।
सबैले जित्न सक्ने टिमको परिचय भुटानले बनाएकाे थियो ।
अब समय उही रहेन ।
देशको अर्थतन्त्र बलियो बनेसंगै भुटानले फुटबलमा प्रसस्त लगानी गर्यो ।
ग्रासरुट कार्यक्रमलाई बलियो बनायो । विभिन्न फुटबल विकासको परियोजना अघि सार्यो ।
यि सबै पछिल्लो एक दशकको कार्यक्रम थियो ।
यसैको नतिजा भुटान अब दक्षिण एसियामा कसैलाई पनि हराउने टिम बनेको छ ।
त्यसैको प्रमाण नेपालमा चलिरहेको १३ औं सागको फुटबलको नतिजालाई हेरे पुग्छ ।
नेपाल बाहेक सबै टिमलाई हराउँदै भुटान साग फुटबलमा फाईनल पुग्ने पहिलो टोली बनेको छ ।
भुटानले श्रीलंका, माल्दिभ्स र बंगलादेशलाई त निरिह जस्तै बनायो ।
प्रभावशाली जित रच्दै फुटबल ईतिहासमा पहिलो पटक सागको फाईनलमा पुग्यो ।
जब उनीहरु फाईनल पुगे, ड्रेसिङ रुपको माहोल बेग्लै देखिन्थ्यो ।
भुटान रोकिन चाहदैन । उ फाईनल जितेर अर्को ईतिहास रच्न चाहन्छ ।
तर भुटान फाईनलको प्रतिद्वन्दी नेपाल नहोस भन्ने कामना गर्छ ।
उसले समूह चरणमा नेपालसंग ४–० को नमिठो हार ब्यहोरेको थियो ।
पहिलो पटक साग इतिहासको फुटबलमा फाइनल पुगेपछि भुटानी राष्ट्रिय यू–२३ टिमका प्रशिक्षक पेमाले नेपाल फाइनलमा नपरे आफ्नो टिम अर्को इतिहास रच्न सफल हुने दाबी गरे ।
शनिबार दशरथ रंगशालामा श्रीलंकाविरुद्व प्रभावशाली जित निकालेपछि सञ्चारकर्मीसंग मुख्य प्रशिक्षक पेमाले नेपालसँग फाइनलमा नपरे आफुहरुको दिन सुखद् हुने बताए ।
‘नेपालसँग फाइनल खेल्न चाहदैनौं ।’ भुटानका पुर्व खेलाडीसमेत रहेका उनले भने ।
शनिबार नियमित कप्तान चेन्चो ग्लेत्सेनविना मैदान उत्रिएको भुटानले श्रीलंकालाई ३–० गोल अन्तरले पराजित गर्याे ।
प्रशिक्षक पेमाले नेपालसँग फाइनल खेल्दा दर्शकको हुटिङमा खेल्न गाह्रो हुने बताए । उनले नेपाल फाइनल नपुग्दा नेपाली दर्शकले आफुलाई समर्थन गर्ने विश्वास ब्यक्त गरे ।
‘मेरो बिचारमा बंगलादेश फाइनल पुगोस् । नेपालसँग फाइनल खेल्न गाह्रो हुन्छ । यदि नेपाल फाइनल पुगेन भने नेपालीहरुले हामीलाई समर्थन गर्नुहुन्छ । त्यसैले हामी चाहन्छौं, बंगलादेश फाइनल पुगोस् ।’ सञ्चारकर्मीसंग नेपाली भाषामै उनले भने ।
समूह चरणको खेलमा नेपालसँग मात्रै पराजित भएको भुटानले श्रीलंका, माल्दिभ्स र बंगलादेशलाई पराजित गरेको थियो ।
नेपालले भोली (आईतबार) फाइनल प्रवेशका लागि बंगलादेशसँग प्रतिस्पर्धा गर्दैछ । फाइनल पुग्न नेपाललाई बराबरी पर्याप्त हुनेछ । बंगलादेशलाई भने जितको विकल्प छैन ।
पहिलो पटक फाइनलमा पुगेको भुटानी टिमका समर्थकले प्यारापिटमै रहेर ‘रातो र चन्द्र सुर्य’ र ‘रेशम फिरिरि’ गितमा रमाईलो गरेका थिए ।
ऐतिहासिक फाइनलपछि भुटानको ड्रेसिङ रुममा बेग्लै माहोल देखिन्थ्यो । उनीहरु माल्दिभ्सका प्रशिक्षकले पोष्ट म्याच सकेर बाहिर निस्कदाँ पनि जितकाे खुसीयाली मनाईरहेका थिए ।
नेपाली भाषामै सञ्चारकर्मीसंग खुलेका उनले टिमले फाइनल यात्रा गर्दा निकै खुसी भएको बताए ।
‘पहिलो पटक फुटबल ईतिहासमा फाइनलमा पुग्दा खुसी भयौ । केटाहरुले राम्रो खेले । फाइनल पुग्दा खुसीनै लाग्छ । भुटानको फुटबलको सबैभन्दा राम्रो क्षण हो । केटाहरु पनि रोईरहेका थिए ।’ उनले भने ।
यस्तै नियमित टिमका कप्तानको स्थान लिएका जिग्मे छिरिङ दोर्जीले खेलाडीले राम्रो खेल्दा फाइनल पुग्न सफल भएको बताए ।
‘चुनौती थियो । डर पनि थियो । तर केटाहरुले राम्रो खेले । खुसी छौ ।’ उनले भने ।
