काठमाडौं । १३ औं दक्षिण एसियाली खेलकुद (साग) को तयारी खेलमा माल्दिभ्सले नेपालको 'ए' टिमलाई सामान्य लक्ष्य प्रस्तुत गरेको छ । शनिबार भएको तेस्रो मैत्रीपूर्ण खेलमा माल्दिभ्सले १ सय १४ रनको लक्ष्य प्रस्तुत गरेको छ ।
मुलपानी क्रिकेट मैदानमा टस जितेर पहिले ब्याटिङ गरेको माल्दिभ्सले निर्धारित २० ओभरमा ९ विकेट गुमाएर १ सय १३ रन बनायो ।
खराब सुरुवात गरेको माल्दिभ्सलाई सस्तैमा समेट्न नेपालका तिलक राज भण्डारीले ३ विकेट लिए । १५ ओभरमा ५ विकेट गुमाएर ५९ रन बनाएको माल्दिभ्सले पछिल्लो ५ ओभरमा ५४ रन जोडेको थियो ।
पहिलो बलमा माल्दिभ्सको विकेट लिएका बिक्रम सोबले २ तथा राहुल प्रताप सिंह, शेर मल्ल र आकास चन्दले समान १/१ विकेट हात पारे ।
यसअघि बिहिबार भएको पहिलो खेलमा नेपालले माल्दिभ्सलाई ४९ रनले पराजित गरेको थियो ।
यस्तै शुक्रबार दोस्रो खेलमा नेपालले माल्दिभ्सलाई १ सय ७ रनले पराजित गरेको थियो ।
माल्दिभ्सविरुद्ध नेपालको 'ए' टिममा साग टिम बाहिर रहेका खेलाडी रहेका छन् ।
