काठमाडौं । १३ औं दक्षिण एसियाली खेलकुद (साग) मा सहभागिता जनाउन नेपाल आएको माल्दिभ्सले नेपालसँग मैत्रीपूर्ण खेल खेल्ने भएको छ ।
मुलपानी क्रिकेट मैदानमा माल्दिभ्सले बिहिबार नेपालको 'ए' टिमसँग मैत्रीपूर्ण खेल खेल्ने भएको हो ।
सागमा सहभागिता जनाउन माल्दिभ्सको टोली मंगलबार नै नेपाल आईसकेको छ । नेपाल र माल्दिभ्सबीचको खेल बिहान ९ बजे सुरु हुनेछ ।
नेपाल 'ए' शरद भेषवाकरको कप्तानीमा मैदान उत्रने छ ।
दक्षिण एसियामा माल्दिभ्स नेपाल भन्दा कमजोर टिम हो । अन्तराष्ट्रिय क्रिकेट परिषद (आईसीसी) को टी-ट्वान्टी वरियतामा माल्दिभ्स ७६ औं स्थानमा रहेको छ ।
नेपाल भने १४ औं स्थानमा रहेको छ ।
त्रिवि क्रिकेट मैदानमा हुने सागको पुरुषतर्फ पाँच टिमले प्रतिस्पर्धा गर्ने छन् । जसमा नेपाल, श्रीलंका, बंगलादेश, भुटान र माल्दिभ्स रहेका छन् । पाँच टिम रहेको कारण नेपालले पदक जित्ने सम्भावना बढी रहेको छ ।
सागमा टेष्ट राष्ट्र (बंगलादेश र श्रीलंका) ले यू-२३ टिम खेलाउने छन् । तर, केहि सिनियर खेलाडी टिममा राख्न पाउने गर्छन । एसोसियट राष्ट्रले भने राष्ट्रिय टिम नै खेलाउने नियम रहेको छ ।
नेपालको पहिलो खेल श्रीलंकासंग डिसेम्बर ३ मा हुनेछ । यस्तै नेपालले डिसेम्बर ५ मा भुटानसँग खेल्दा डिसेम्बर ६ मा माल्दिभ्सको सामना गर्नेछ । नेपालले अन्तिम खेलमा डिसेम्बर ७ मा बंगलादेशसँग खेल्नेछ ।
