एजेन्सी । इन्टरनेसनल च्याम्पियन्स कपको अन्तिम खेलमा इन्ग्लिश क्लब टोटेनहमले साँघुरो जित निकालेको छ ।
बुधबार बिहान भएको खेलमा टोटेनहमले इटालियन क्लब एसी मिलानलाई १ – ० गोल अन्तरले हराएको हो ।
एनएफएल स्टेडियममा टोटेनहमलाई जित दिलाउन जर्जेस केभिन एन्कोन्डोउले निर्णायक गोल गरे । पहिलो हाफ गोलरहित बराबरीमा सकिएको खेलको ४७ औं मिनेटमा जर्जेसले निर्णायक गोल गरेका थिए ।
यो जितसंगै टोटेनहमले अमेरिकाको प्रि सिजनको तयारी समेत सकेको छ । यसअघिको खेलमा टोटेनहम बार्सिलोनासंग पराजित भएको थियो ।
युरोपियन क्लब फुटबलको नयाँ सिजन सुरुअघि तयारी गर्न टोटेनहम र एसी मिलान अमेरिका भ्रमणमा रहेका छन् । युरोपियन क्लब फुटबलका लिगहरु यही अगष्टबाट सुरु हुँदैछ ।
