काठमाडौं । सायद, सपना नदेख्ने को होला र ? धेरैले सपना देखेका हुन्छन्, सपना बोकेका हुन्छन् ।
कतिको सपना पुरा हुन्छ, कतिको अधुरै रहन्छ ।
नेपाली क्रिकेटले पनि एक सपना देखेको थियो । जुन, बुधबार पुरा हुँदैछ ।
यसको मतलब, नेपालले बुधबार इतिहासमै पहिलोपटक एकदिवसीय अन्तर्राष्ट्रिय क्रिकेट खेल्दै छ ।
र, यो नेपाली क्रिकेटको बर्षौको सपना थियो ।
एकदिवसीय क्रिकेटको डेब्यु खेल खेल्न नेपाली टोली नेदरल्याण्डको एमस्ट्राडम पुगिसकेको छ ।
नेपालले घरेलु टोलीविरुद्ध बुधबार पहिलो र शुक्रबार दोस्रो गरी दुई खेलको एकदिवसीय सिरिज खेल्नेछ ।
यो खेल नेपाली क्रिकेटले २२ बर्षअघि देखेको सपना हो ।
गत फेब्रुअरीमा जिम्बावेमा भएको विश्वकप छनोटबाट नेपालले अन्तर्राष्ट्रिय क्रिकेट परिषद (आइसीसी) बाट एकदिवसीय अन्तर्राष्ट्रिय राष्ट्रको मान्यता पाएको थियो ।
छनोटमा एसोसिएटतर्फ उत्कृष्ट तीन टोलीमा रहेर नेपालले ऐतिहासिक सफलता पाएको थियो । चार बर्षको लागि नेपालले पाएको मान्यता यहीँ जुलाईबाट लागु भएको हो ।
नेपालले एकदिवसीय मान्यता पाएपछि नेदरल्याण्डले ऐतिहासिक क्षणको लागि आथित्यमा प्रदान गरेको हो ।
नेपालले पहिलो खेलमा बुधबार अपरान्ह घरेलु टोलीविरुद्ध खेल्नेछ । भीआरए क्रिकेट मैदानमा हुने खेल नेपाली समयअनुसार २:४५ मा सुरु हुनेछ । जुन, खेल नेपाली क्रिकेटको पर्खाइको खेल हो ।
एकदिवसीय क्रिकेटको पहिलो खेल डेब्युको लागि मात्र महत्वपूर्ण रहने छैन ।
यो नेपाली क्रिकेटको भावी पुस्तासंग समेत जोडिने गर्छ । नेपालको लागि यो २२ बर्षको मेहेनत समेत हो ।
किनकी नेपाली क्रिकेटले यो ठाउमा स्थान बनाउन निकै संघर्ष गरेको छ ।
कप्तान पारस खड्का भन्छन् , 'हामीले एकदिवसीय राष्ट्र बन्न कडा मेहेनत गरेका छौं र नेदरल्याण्डसंगको खेल हाम्रो लागि क्षमता देखाउने मौका र अनुभव हुनेछ ।'
नेपाल डेब्यु खेलमा जित निकाल्दै आफ्नो शानदार सुरुवातको योजनामा हुनेछ । यसलाई सफलता दिलाउन नेपाली टोलीले निकै मेहनत पनि गरेको छ ।
आइसीसीसंग कप्तान पारसले भनेका छन्, 'आशा छ हामीले पहिलो खेलमा राम्रो गर्ने छौं ।'
सन् १९८८ मा आईसीसीको सदस्य बनेको नेपालले सन् १९९६ मा पहिलोपटक एसोसियट राष्ट्रको मान्यता पाएको थियो । र, नेपालको २२ वर्षे क्रिकेट यात्रामा यो सबैभन्दा ठूलो उपलब्धि हो ।
यसबीचमा नेपाली क्रिकेटले धेरै आरोह र अवरोह पार गर्यो । नेपालले केहि सफलता र केहि दुखद घटनाको सामना गर्यो ।
टी- ट्वान्टी विश्वकप खेलेको नेपाली क्रिकेटले संघको विवाद र निलम्बनसम्मको अवरोह खेपेको छ ।
सन् २००८ बाट विश्व क्रिकेट लिग डिभिजन-५ खेल्दै नेपालले अन्तर्राष्ट्रिय क्रिकेटमा आफ्नो यात्रा फराकिलो बनाएको थियो ।
तर, नेपाललाई डिभिजन-५ को उपाधि जित्न दुई बर्ष लागेको थियो ।
सन् २०१० को डिभिजन-५ मा अमेरिकालाई हराएर नेपालले ट्रफीसहित डिभिजन-४ मा स्थान पक्का गरेको थियो ।
यस्तै नेपाललाई डिभिजन-३ मा प्रवेश पाउन दुई बर्ष नै लागेको थियो ।
सन् २०१२ मा मलेसियामा भएको डिभिजन-४ को उपाधि जितेपछि नेपाल डिभिजन-३ मा बढुवा भएको थियो । त्यसपछि सन् २०१३ मा नेपालले डिभिजन-३ को उपाधि जित्दै डिभिजन-२ को यात्रा तय गरेका थिए ।
डिभिजन-३ मा प्रवेश गरेको अर्को बर्ष नेपालकी क्रिकेटको लागि ऐतिहासिक बर्ष भएको थियो ।
किनकी नेपालले पहिलोपटक आइसीसीको सबैभन्दा ठुलो प्रतियोगिता विश्वकप खेलेको थियो ।
सन् २०१४ मा बंगलादेशमा भएको टी-ट्वान्टी विश्वकप खेल्न पाउनु नेपालको पहिलो ऐतिहासिक क्षण थियो ।
समूह चरण पार गर्न नसकेपनि नेपालले हङकङलाई ८० रनले हराएर सबैको ध्यान आकर्षित गरेका थिए ।
उक्त विश्वकपमा हङकङका तीन ब्याट्सम्यानलाई पेभेलियन फर्काएर नेपाललाई जित दिलाउने बलर शक्ति गौचन यही नेदरल्याण्डसंगको सिरिजबाट सन्यास लिदैछन् ।
भेट्रान बलर शक्तिले यो अन्तिम विदेश भ्रमण रहेको घोषणा गरिसकेका छन् ।
विश्वकप खेलेको अर्को बर्ष नेपालले सन् २०१५ देखि २०१७ सम्म चलेको आइसीसी विश्व क्रिकेट लिग च्याम्पियनसिप खेल्यो ।
नेपालको प्रदर्शन उच्च हुन् सकेन तर नेपालले अन्तर्राष्ट्रिय खेल खेल्ने अवसर भने पाईरह्यो ।
जसमा नतिजा नेपालले डिभिजन-२ मा प्राप्त गर्यो ।
नामिवियामा फेब्रुअरीमा भएको डिभिजन–२ मा नेपालले उपाधि त जित्न सकेन ।
तर, उपविजेता बन्दै नेपाल जिम्बावे विश्वकप छनोट प्रतियोगितामा पुगेको थियो । त्यहि विश्वकप छनोटले नेपालको एकदिवसीय सपना पुरा गरेको छ ।
एकदिवसीय मान्यता पाएर हौसिएको नेपालले अब टेष्ट राष्ट्र बन्ने लक्ष्य राखेको छ ।
तर, नेपाललाई यो अवसरलाई जोगाउन नै चुनौती हुनेछ ।
कप्तान पारसले समेत यो कुरालाई ख्याल गरेका छन् ।
'नेदरल्याण्डसंगको पहिलो एकदिवसीय खेल नेपालको लागि नयाँ सुरुवात हो । हामी यो स्थानमा आउन चाहेका थियौं । तर, हामीलाई अब अगाडी बढ्न थप चुनौती छ,' आइसीसीसंग कप्तान पारसले भनेका छन् ।
-1732845388.webp)
