काठमाडौं । प्रधानमन्त्री केपी शर्मा ओलीले नेपाली क्रिकेट टिमका नवनियुक्त कप्तान ज्ञानेन्द्र मल्ललाईे बधाई दिएका छन् ।
कप्तान चयन भएको दुई दिनपछि प्रधानमन्त्री ओलीले कप्तान मल्ललाई बधाई दिएका हुन् । प्रधानमन्त्री ओलीले शुक्रबार सामाजिक संजाल ट्वीटरबाट बधाई दिएका हुन् ।
'नेपाली क्रिकेट टोलीको कप्तान छानिनु भएकोमा ज्ञानेन्द्र मल्ललाई हार्दिक बधाई दिन चाहन्छु,' प्रधानमन्त्री ओलीले ट्वीट गर्दै लेखेका छन्, 'उहाँको नेतृत्वमा नेपाली क्रिकेटले नयाँ उचाई प्राप्त गर्ने विश्वास सहित शुभकामना व्यक्त गर्दछु ।'
नियमित कप्तान पारस खड्काले कप्तानबाट राजीनामा दिएपछि नेपाल क्रिकेट संघ (क्यान) ले मल्ललाई बुधबार कप्तानीको जिम्मेवारी दिएको थियो ।
कप्तान चयन भएपछि मल्ललाई पूर्व प्रधानमन्त्री तथा नेकपाका अध्यक्ष पुष्पकमल दाहाल 'प्रचण्ड' लगायतले यस अघि नै बधाई दिएका थिए ।
