काठमाण्डौं । ललित स्मृति यू-१८ फुटबल च्याम्पियनसिपमा विभागीय टोली त्रिभुवन आर्मी क्लबले लगातार दोस्रो जित निकालेको छ । आज भएको खेलमा लुम्बिनी फुटबल क्लबलाई ४ - ० ले हराउदै आर्मीले लगातार दोस्रो जित निकालेको हो ।
सातदोबाटोस्थित एन्फा टेक्निकल सेन्टरमा भएको खेलमा आर्मीलाई जित दिलाउन दिनेश हेम्जान, सुशन लामा, रोशन थाम्सुहाङ र दिपेश आले मगरले समान एक एक गोल गरे । जितसँगै आर्मीले प्रतियोगिताको दोस्रो चरणमा पुग्ने सम्भावना बलियो बनाएको छ । आर्मीले दुई खेलबाट ६ अंक जोडेको छ ।
पहिलो हाफको २६ औँ मिनेटमा कप्तान दिनेशले गोल गर्दै आर्मीलाई सुरुवाती अग्रता दिलाएका थिए । खेलको ४४ औं मिनेटमा आर्मीका सुशनले गोल गर्दा पहिलो हाफमा आर्मीले २ - ० गोलको अग्रता बनाएको थियो । आर्मीले दोस्रो हाफमा थप दुई गोल गर्यो ।
खेलको ७५ औं रोशनले आर्मीको लागि तेस्रो गोल गरे । त्यसपछि खेलको अन्तिम समयमा दिपेशले गोल गर्दै आर्मीलाई ४ - ० को सहज जित दिलाए ।
