काठमाडौं । विराटनगर टाईटन्सले महिलाको फ्रेन्चाईज क्रिकेट लिग वुमेन च्याम्पियन्स लिग (डब्लुसीएल) मा लगातार दोस्रो जित निकालेको छ ।
शुक्रबार भएको खेलमा पोखरा पल्टनलाई ६ विकेटले हराउँदै विराटनगरले लगातार दोस्रो जित निकालेको हो ।
किर्तिपुरस्थित टियु क्रिकेट मैदानमा पोखराले दिएको ९५ रनको सामान्य विराटनगरले १५ ओभरमा मात्र ४ विकेट गुमाएर पुरा गर्यो ।
विराटनगरको जितमा लक्ष्मी चौधरीले २३ तथा ज्योति पाण्डेले २२ रन जोडिन् । अश्मिना कर्माचार्यले अविजित १६ र डोली भट्टले १२ रन जोडिन् ।
पोखराकी सिता राना मगरले २ विकेट लिईन् ।
यस अघि टस जितेर पहिले ब्याटिङ गरेको पोखराले २० ओभरमा ५ विकेट गुमाएर ९४ रन बनाएको थियो ।
पोखराका लागि कविता कुवरले अविजित रहदै सर्वाधिक २२ रन जोडिन् । यस्तै कप्तान सिता राना मगरले १६ रन जोड्दा अन्जली चन्दले १५ तथा रेवती धामीले १२ रन बनाईन् । सरस्वती मगर १० रनमा अविजित रहिन् ।
विराटनगरकी सबनम राईले २ विकेट लिईन् । सोनु खड्काले १ विकेट लिईन् ।
जितसँगै विराटनगरले २ खेलमा ४ अंक जोडेको छ । शीर्ष स्थानको विराटनगरले पहिलो खेलमा ललितपुर फाल्कोन्सलाई ४ विकेटले हराएको थियो ।
पोखराको भने यो लगातार दोस्रो हार हो । पहिलो खेलमा पोखरा क्वाट क्विन्स काठमाडौंसँग ८२ रनले पराजित भएको थियो ।
-1735037168.JPG)
