एजेन्सी । प्रि सिजन अन्तर्गतको इन्टरनेसनल च्याम्पियन्स कप फुटबलमा इन्ग्लिश क्लब टोटेनहमले सहज जित निकालेको छ । बिहिबार भएको खेलमा टोटेनहमले इटालियन क्लब रोमालाई ४ – १ ले पराजित गरेको हो ।
अमेरिकाको क्यालिफोर्नियामा भएको खेलमा टोटेनहमलाई जित दिलाउन फर्नान्डो लोरेन्टे र लुकास मुराले २ – २ गोल गरे । रोमाका प्याट्रिक सेकले एक गोल गरे । खेलमा पाँचै गोल पहिलो हाफमा भएको थियो । र, टोटेनहमले रोमाले लिएको सुरुवाती अग्रता उल्टाएर जित हासिल गरेको हो ।
पहिलो हाफको तेस्रो मिनेटमा प्याट्रिकले गोल गर्दै रोमालाई सुरुवाती अग्रता दिलाएका थिए । तर, खेलको नवौं मिनेटमा लोरेन्टेले गोल गर्दै टोटेनहमलाई खेलमा फर्काए । खेलको १८ औं मिनेटमा लोरेन्टले व्यक्तिगत दोस्रो गोल गर्दै टोटेनहमलाई २ – १ को अग्रता दिलाए ।
त्यसपछि खेलमा टोटेनहमका मुरा चम्किए । खेलको २८ औं मिनेटमा पहिलो गोल गरेका मुराले ४४ औं मिनेटमा व्यक्तिगत दोस्रो गोल गर्दै टोटेनहमलाई ४ – १ को फराकिलो जित दिलाए ।
