काठमाडौं । अखिल नेपाल फुटबल संघ (एन्फा) ले आफ्नो लोगो परिवर्तन गर्ने भएको छ । एन्फाले बुधबार आयोजित एक कार्यक्रममा लोगो परिवर्तन गर्ने जानकारी गराएको हो ।
एन्फाको कार्यनीति, ग्रासरुट, विधान र नियमावलीमाथी क्लबस्तरीय अन्तरक्रिया कार्यक्रममा एन्फा अध्यक्ष कर्मा छिरिङ शेर्पाले लोगो परिवर्तन गर्ने निर्णय भएको जानकारी गराए । अध्यक्ष शेर्पाले भने, 'फुटबल खेल्ने अन्य १४ देशले पनि आफ्नो लोगो परिवर्तन गरिसकेको छ । अब हामीले लोगो परिवर्तन गर्ने निर्णय लिएका छौं।'
अध्यक्ष शेर्पाले एन्फाको लोगो कस्तो राख्ने भन्ने बिषयमा केहि समयपछि निर्णय लाग्ने बताए । शेर्पाको अनुसार लोगो परिवर्तनको लागि एन्फाले छनोट प्रतियोगिता आयोजना गर्नेछ । उक्त छनोट प्रतियोगितामा उत्कृष्ट हुने लोगोलाई एन्फाले नयाँ लोगोको रुपमा प्रयोग गर्नेछ ।
