सिंगापुर जाने क्रिकेट टिमको विदाई

गृहपृष्ठ
क्रिकेट

बिहीबार, असोज ९, २०७६ खेलपाटी संवाददाता

काठमाडौं । सिंगापुरमा आयोजना हुने तीन राष्ट्रबीचको त्रिकोणात्मक टी-ट्वान्टी क्रिकेट सिरिज खेल्न जाने नेपाली राष्ट्रिय क्रिकेट टिमको विदाई गरिएको छ ।

नेपाली टोलीलाई बुधबार साँझ राष्ट्रिय खेलकुद परिषद राखेपका सदस्य सचिव रमेश सिलवालले विदाई गरे । नेपाली टिम आज राति १०:१५ बजे सिंगापुर प्रस्थान गर्ने छन् ।

खेलाडीको विदाई गर्दै सदस्य सचिव सिलवालले खेलाडीलाई नतिजा निकाल्ने गरि प्रदर्शन गर्न सुझाब दिए ।

'सिरिजमा नेपालले गर्ने प्रर्दशनले क्रिकेटकाे दिशा तय गर्छ । पिचको कन्डिसन अनुसार प्रर्दशन गर्न अनुराेध गर्छु,' सदस्य सचिव सिलवालले भने, 'हरेक दिन हरेक ओभर महत्वपूर्ण हुन्छ । खेलाडीलाई नजिता निकाल्ने गरि खेल्न अनुराेध गर्छु ।'

सिंगापुर क्रिकेटको आयोजनामा हुने टी-ट्वान्टी सिरिज शुक्रबारबाट सुरु हुनेछ । सिरिजमा नेपाल, आयोजक सिंगापुर र टेष्ट राष्ट्र जिम्बावेबीच प्रतिस्पर्धा हुनेछ ।

नेपालले शुक्रबार जिम्वाबेसँग खेल्दै सिरिजको सुरुवात गर्नेछ । यस्तै शनिबार नेपालले सिंगापुरसँग खेल्नेछ ।

डबल राउण्ड रोबिनको आधारमा हुने सिरिजमा नेपालले जिम्वाबेसँग अर्को साताको मंगलबार दोस्रो खेल खेल्नेछ । यस्तै अर्को साताको बुधबार सिंगापुरसँग खेल्नेछ ।

डबल राउण्ड रोबिनको आधारमा हुने सिरिजको शीर्ष दुई टोलीले फाइनल खेल्नेछ ।

प्रतियोगिताको लागि नेपालले गत बिहिबार नै १५ सदस्सीय टिमको घोषणा गरिसकेको छ । आईसीसीका प्रतिनिधि अमिनुल इस्लाम, प्रशिक्षक उमेश पटवाल र कप्तान पारस खड्काले नेपाली टोली छनोट गरेका हुन् ।

नेपालले घोषणा गरेको टिममा दुई नयाँ अनुहार छन् । जसमा ईशान पाण्डे र कुशल मल्ल रहेका छन् । घरायसी कामले ज्ञानेन्द्र मल्ल टिममा नहुदा दिपेन्द्र सिंह ऐरीलाई उपकप्तानको जिम्मेवारी दिईएको छ ।

यस्तै अनुभवी खेलाडी शरद भेषवाकर र भेट्रान बलर बसन्त रेग्मी टिममा अटाएका छैनन् ।