काठमाडौं । क्यारेबियन क्रिकेट लिग (सीपीएल) क्रिकेटमा नेपाली राष्ट्रिय टोलीका लेग स्पिनर सन्दीप लामिछाने रहेको टिम बार्बाडोस ट्रिडेन्ट पराजित भएको छ ।
मंगलबार विहान भएको खेलमा बार्बाडोस जमैका तालेवाजसँग ५ रनले पराजित भएको हो ।
ब्रिजटाउनमा जमैकाले दिएको १२८ रनको लक्ष्यसहित जवाफी ब्याटिङ गरेको बार्बाडोसले २० ओभरमा ९ विकेट गुमाएर १२२ रन मात्र बनाउन सक्यो ।
बार्बाडोसका लागि जोनसन चार्ल्सले ३१ तथा रेमन रिफरले २६ रन बनाए । सन्दीप ९ रनमा अविजित रहे । जमैकाका इमरान खान र शमार स्प्रिङगरले ३/३ विकेट लिए ।
यसअघि टस हारेर पहिले ब्याटिङ गरेको जमैकाले २० ओभरमा अलआउट हुँदै १२७ रन बनाएको थियो ।
जमैकाका लागि ग्लेन फिलिप्सले ४१ रन बनाए । यस्तै रामेल लेविसले २७ रन जोडे ।
जमैकाविरुद्ध सन्दीपले किफायती बलिङ गरे । ४ ओभरमा १७ रन खर्चेर सन्दीपले २ विकेट लिए । योसँगै सन्दीपले ६ खेलमा ८ विकेट हात पार्न सफल भएका छन् ।
तर, सन्दीपले लिगका बाँकी खेल भने गुमाउने छन् । अब सन्दीप राष्ट्रिय टिममा सामेल हुन सिंगापुर आउने छन् ।
यस्तै बार्बाडोसका जासन होल्डर र रेमोन रिफरले पनि २/२ विकेट लिए ।
यो हारसँगै चौंथो स्थानको बार्बाडोसले ६ खेलमा ४ अंक जोडेको छ । दोस्रो जित निकालेको जमैकाको ८ खेलमा ४ अंक रहेको छ ।
