काठमाडौं । पहिलो पटक नेपाली राष्ट्रिय क्रिकेट टिममा स्थान बनाएका ईशान पाण्डेले टिममा परेपनि आफ्नो सपना अझै पुरा नभएको बताएका छन् ।
सिंगापुरमा आयोजना हुने तीन राष्ट्रबीचको त्रिकोणात्मक टी-ट्वान्टी क्रिकेट सिरिजका लागि नेपालले बिहिबार घोषणा गरेको १५ सदस्सीय टोलीमा ब्याट्सम्यान ईशान परेका थिए ।
तर, ईशानले टिममा पहिलो पटक स्थान बनाउनु आफ्नो लागि अवसर मात्र रहेको कारण आफ्नो सपना पुरा भईनसकेको बताए ।
'राष्ट्रिय टिममा त परेको छु तर मेरो सपना अझै पुरा भएको छैन । मलाई अहिलेसम्म यो अवसर हो भन्ने लागेको छ,' ईशानले भने, 'मैले एउटा खेल नेपाललाई जिताउन सके भने मेरो मेहनत सफल भएको लाग्छ । त्यसैले म राष्ट्रिय टिममा पर्दा मात्र मेरो सपना पुरा भएको जस्तो लाग्दैन । मेरो सपना भनेको नेपाललाई खेल जिताउनु हो ।'
आयोजक सिंगापुरसहित नेपाल र जिम्बावेबीच हुने सिरिजका लागि ईशानसंगै कुशल मल्लले पनि राष्ट्रिय टिममा पहिलो पटक स्थान बनाउन सफल भएका छन् । उमेर समूह र घरेलु लिगमा आफुलाई प्रमाणित गरेका दुवैले राष्ट्रिय टिमको ढोका खोलेका हुन् ।
गत संस्करणको प्रधानमन्त्री कपमा उत्कृष्ट प्रदर्शन गरेका ईशानलाई नेपालमा आयोजना हुने १३ औं दक्षिण एसियाली खेलकुद (साग) का लागि बन्द प्रशिक्षणमा डाकिएको थियो । र, बन्द प्रशिक्षणमा राम्रो गरेकै कारणआफु टिममा परेको ईशान बताउछन् ।
'टिममा पर्छु भन्ने त आश लागेको थियो त्यसैले कडा मेहनत गरेको थिए । क्याम्पमा पनि राम्रो गरे र टिममा पर्न सफल भएको छु,' ईशानले भने ।
नेपाली राष्ट्रिय टिममा लामो समय देखिको समस्या भनेको ओपनिङ हो । त्यही ओपनिङको लागि ईशानले सिंगापुर भ्रमणमा मौका पाएका हुन् । यसपटक उपकप्तान तथा ओपनर ज्ञानेन्द्र मल्लले सिंगापुर भ्रमण नगर्ने भएपछि ईशानले ओपनिङ गर्ने बलियो सम्भाबना रहेको छ ।
सिंगापुरमा ओपनिङ गर्नु परे ईशानलाई कठिन हुने छैनन् । ईशानलाई आफ्नो क्षमतामा विश्वास छ ।
'मैले क्रिकेट खेल्न सुरु गरे देखि ओपनिङ गर्दै आएको छु । त्यसैले मलाई त्यस्तो प्रेसर छ जस्तो लाग्दैन । मात्र कुरा केहो भने मैदान छिर्दा मैले मौकाको रुपमा लिन्छु कि दबाद त्यही कुरा मुख्य हो,' ईशान भन्छन् ।
यस्तै ईशान राष्टिय टिममा पर्नुको खेल जीवनको टर्निङ पोइण्ट नभएको समेत बताउछन् ।
'यसलाई म मेरो खेल जीवनको टर्निङ पोइण्ट मान्दिन, जुन दिन मैले नेपाललाई खेल जिताउछु त्यो दिन मेरो खेल जीवनको सफल टर्निङ पोइण्ट हुनेछ,' ईशानले भने ।
सिंगापुर क्रिकेटको आयोजनामा हुने टी-ट्वान्टी सिरिज सेप्टम्बर २७ बाट सुरु हुनेछ । नेपालले जिम्वाबेसँग सेप्टेम्बर २७ मा खेल्दै सिरिजको सुरुवात गर्नेछ ।
यस्तै २८ सेप्टेम्बरमा नेपालले सिंगापुरसँग खेल्नेछ । डबल राउण्ड रोबिनको आधारमा हुने सिरिजमा नेपालले जिम्वाबेसँग अक्टोबर १ मा दोस्रो खेल खेल्नेछ । यस्तै २ अक्टोबरमा सिंगापुरसँग खेल्नेछ ।
डबल राउण्ड रोबिनको आधारमा हुने सिरिजको शीर्ष दुई टोलीले फाइनल खेल्नेछ ।
