काठमाडौं । एसीसी यू-१९ एसिया कप क्रिकेट श्रीलंकामा जारी छ । तर, नेपाली यू-१९ क्रिकेट टिम स्वदेश फर्किसकेका छ ।
समूह चरणबाटै बाहिरिएपछि नेपाली टिम बुधबार नै स्वदेश फर्किएको हो ।
एसिया कपको ३ खेलमा १ जित हात पारेको नेपालले सेमिफाइनलको यात्रा भने तय गर्न सकेन ।
नेपाल दोस्रो पटक एसिया कपको सेमिफाइनल पुग्ने लक्ष्य सहित श्रीलंका प्रस्थान गरेको थियो । प्रतियोगिता सुरु हुनु भन्दा करिब २ हप्ताअघि श्रीलंका पुगेको नेपालले ३ अभ्यास खेल समेत खेल्ने मौका पाएको थियो । अभ्यास खेल र करिब २ हप्ताको श्रीलंका बसाइले प्रतियोगितामा नेपाललाई मद्दत मिल्ने अनुमान नेपालको थियो ।
सन् २०१७ को संस्करणमा नेपालले भारतलाई पराजित गरेको थियो । समूह चरणको खेलमा भारतलाई १९ रनले पराजित गर्दै नेपाल इतिहासिक जितसहित सेमिफाइनल पुगेको थियो । कुनै पनि क्रिकेटमा नेपालले भारतलाई पराजित गरेको त्यो नै पहिलो पटक हो ।
यस संस्करणमा पनि नेपालले त्यहीँ प्रदर्शन गर्ने अनुमान गरिएको थियो । कप्तान रोहित कुमार पौडेल, पवन सर्राफ, सन्दीप जोरा र भिम सार्की जस्ता खेलाडीले राष्ट्रिय टिमबाट समेत खेलिसकेका थिए । तर, नेपालले टेष्ट राष्ट्रसामु राम्रो चुनौती मात्र दिन सक्यो ।
प्प्ररतियोगितामा नेपालले सबै खेलमा पहिले ब्याटिङ गरेको थियो । नेपालको ब्याटिङ भन्दा बलिङ पक्ष बलियो मानिन्छ तर यस पटक नेपालको ब्याटिङमा राम्रो सुधार देखिएको थियो । सबै खेलमा पहिले ब्याटिङ गर्दै नेपालले चुनौतीपूर्ण लक्ष्य प्रस्तुत गरेको थियो ।
पहिले खेलमा श्रीलंकासामु ४२ ओभरमा ९ विकेट गुमाएर १ सय ५९ रन नै नेपालको प्रतियोगिताको कम स्कोर हो । यस बाहेक बंगलादेशविरुद्ध पुरा ५० ओभरमा ८ विकेट गुमाएर २ सय ६१ रन बनाएको थियो । जुन स्कोर नेपालको लागि सामान्य हैन । नेपालले दिएको उच्च लक्ष्य बंगलादेशले समेत अन्तिम ओभरको दोस्रो बलमा ४ विकेट गुमाएर पुरा गरेको थियो ।
यस्तै युएईविरुद्ध सुरुवाती ओभरमा ८ रनको स्थितिमा २ विकेट गुमाएको नेपालले पुरा ओभर खेल्दै प्रतियोगितामा आफ्नो सर्वाधिक स्कोर २ सय ८५ रन बनाएको थियो ।
समूह 'बी' मा रहेको नेपालले टेष्ट राष्ट्र श्रीलंका र बंगलादेशसँग हार व्यहोर्दा युएईमाथि भने शानदार जित निकालेको थियो ।
पहिलो खेलमा नेपाल आयोजक श्रीलंकासँग डीएल पद्दतिको आधारमा ५ विकेटले पराजित भएको थियो । यस्तै, गर या मरको खेलमा बंगलादेशसँग ६ विकेटले पराजित हुँदै नेपाल प्रतियोगिताबाट बाहिरिएको थियो ।
अन्तिम खेलमा भने युएईलाई १६० रनले पराजित गर्दै नेपालले सान्त्वना निकालेको थियो । जितसंगै नेपालले युएईसँग आईसीसी यू-१९ विश्वकप छनोटमा व्यहोरेको हारको बदला समेत लिएको थियो ।
एसिया कपमा नेपालको स्कोरबोर्डमा कप्तान रोहित कुमार पौडेल सफल रहे । ३ खेलमा १ सय २८ रन प्रहार गरेका उनले युएईविरुद्ध ६७ रनको अर्धशतकीय इनिङ्स खेले ।
यस्तै ब्याटिङतर्फ सन्दीप जोरा दोस्रो सफल ब्याट्सम्यानका रुपमा रहे । इस्टर्न रिजन प्रतियोगितामा विश्राम पाएका उनले यस प्रतियोगितामा राम्रो कम्ब्याक गरे । उनले ३ खेलमा १ सय ४ रन बनाउन सफल रहे । जसमा उनले बंगलादेशविरुद्ध विस्फोटक ब्याटिङ गर्दै ३७ बलमा ३ चौका र ३ छक्कासहित ५६ रन बनाएका थिए ।
नेपालका लागि सर्वाधिक रन बनाउने सूचिको तेस्रो स्थानमा ओपनर रित गौतम रहे । ३ खेलमा ८६ रन बनाएका उनले पहिलो खेलमा ८६ बलमा सर्वाधिक ५४ रन बनाए तर बाँकी २ खेलमा भने मात्र ३२ रन जोडे जसमा युएईविरुद्ध गोल्डेन डक भएका थिए ।
३ खेलमा ८५ रन बनाएका अर्का ओपनर पवन सर्राफ नेपालका लागि एक इनिङ्समा सर्वाधिक रन बनाउने खेलाडी रहे । बंगलादेशविरुद्ध उनले ८१ रनको इनिङ्स खेल्दै नेपाललाई चुनौतिपूर्ण लक्ष्य प्रस्तुत गर्न ठुलो योगदान गरेका थिए ।
बलिङतर्फ राशिद खानले सर्वाधिक विकेट हात पारे । अलराउन्ड प्रदर्शन गरेका उनले ३ खेलमा ५ विकेट हात पारे । राशिदले ब्याटिङमा समेत ६५ रन बनाउँदा नेपालका सर्वाधिक रन बनाउने पाँचौं खेलाडी बने ।
यस्तै कमल सिंह ऐरी र सागर ढकालले समान ४/४ विकेट हात पार्दा पवनले ३ विकेट लिए ।
