काठमाडौं । इंग्ल्यान्डको लर्ड्समा हुने एक दिने त्रिकोणात्मक टी-ट्वान्टी सिरिजको खेल तालिका सार्वजनिक भएको छ । लर्ड्सले शुक्रबार राति नेपालसहित तीन टोली सहभागी त्रिकोणात्मक सिरिजको खेल तालिका सार्वजनिक गरेको हो ।
क्रिकेटको मक्का मानिने इंग्ल्यान्डको लर्ड्समा जुलाई २९ मा हुने त्रिकोणात्मक टी-ट्वान्टी सिरिजमा नेपालसहित नेदरल्याण्ड र मेरिलिबोन क्रिकेट क्लब (एमसिसी) ले प्रतिस्पर्धा गर्ने छन् । सिरिज अन्तर्गत नेपाल र नेदरल्याण्डबीचको खेल भने टी-ट्वान्टी अन्तर्राष्ट्रिय मान्यता प्राप्त हुनेछ ।
लर्ड्सले निकालेको खेल तालिका अनुसार पहिलो खेलमा एमसिसी र नेदरल्याण्डबीच खेल हुनेछ । उक्त खेल नेपाली समय अनुसार २:४५ मा सुरु हुनेछ । यस्तै नेपाली समय अनुसार बेलुका ५:५५ मा हुने खेलमा एमसिसी र नेपालले खेल्ने छन् । सिरिज अन्तर्गत अन्तिम खेलमा नेपाल र नेदरल्याण्डले खेल्ने छन् । नेपाल र नेदरल्याण्डबीचको खेल राति ९:०५ मा सुरु हुनेछ ।
यो त्रिकोणात्मक सिरिजका लागि लर्ड्सले टिकट बेच्न सुरु गरिसकेको छ । यो खेलको लागि वयस्कहरुको लागि १७ पाउण्ड टिकट मूल्य राखिएको छ । यस्तै बालबालिकाको लागि ५ पाउण्डको टिकट राखिएको छ । टिकट लर्ड्सको वेबसाइडबाट किन्न सकिनेछ ।
त्रिकोणात्मक टी-ट्वान्टी सिरिज र नेदरल्याण्डसंग एकदिवसीय क्रिकेट सिरिजको लागि युरोप भ्रमणमा रहेको नेपाली क्रिकेट टोलीले आज (शनिबार) पहिलो अभ्यास खेल खेल्दैछ । नेपालले आज इंग्ल्यान्डको स्थानीय क्लब ह्यामसायर होग्ससंग ५० ओभरको खेल खेल्नेछ ।
त्रिकोणात्मक सिरिजपछि नेपाली टोली एकदिवसीय क्रिकेटको डेब्यु खेल खेल्न नेदरल्याण्ड जानेछन् । नेपालले एमस्ट्राडममा अगस्ट १ र ३ मा नेदरल्याण्डसंग दुई खेलको सिरिज खेल्नेछ ।
यस्तै सिरिजको लागि लर्ड्सले श्रीलंकाका पुर्व क्रिकेटर महेला जयबर्धनेको कप्तानीमा एमसिसीको टोली घोषणा गरेको छ । टोलीमा इंग्ल्यान्डका निक कम्पटोन, स्कटल्याण्डका डायलन बज, एलास्डर ईभान्स र मार्क वाट र जिम्बावेका पिटर मुर रहेका छन् । यस्तै खासिफ अली, इयन बेल, जेम्स फोस्टर, डोमिनिक मन्थोर्पे, बेन सेअर्स र जोनाथन ट्रोट्ट रहेका छन् ।
-1732845388.webp)
