एजेन्सी । इन्ग्लिश क्लब लिभरपुलले मैत्रीपूर्ण क्लब फुटबलमा जित निकालेको छ । बिहिबार राति भएको खेलमा लिभरपुलले दोस्रो डिभिजनको ब्लाकबर्न रोभार्सलाई २–० ले हराएको हो ।
लिभरपुललाई जित दिलाउन लाजार मार्कोभिच र ड्यानियल स्टुर्रिजले समान एक एक गोल गरे । पहिलो हाफ गोलरहित बराबरीमा सकिएको खेलको दोस्रो हाफमा लिभरपुलले दुई गोल गरेका थिए ।
खेलको ६३ औं मिनेटमा मार्कोभिचले गोल गर्दै लिभरपुललाई सुरुवाती अग्रता दिलाएका थिए । खेलको ७३ औं मिनेटमा स्टुर्रिजले गोल गर्दै लिभरपुललाई २ – ० को जित दिलाए ।
इन्ग्लिश प्रिमियर लिग सुरु हुनु अघिको प्रि-सिजन तयारीमा रहेको लिभरपुलले ब्लाकबर्नसंग मैत्रीपूर्ण खेल खेलेको हो । इन्ग्लिश प्रिमियर लिग अगस्टबाट हुँदैछ ।
