राजविराज । सप्तरीमा जारी मेयर कप सप्तरी प्रिमियर लिगमा सोमबार बजाज खडक वारियर्सले बोदे बर्साइन थन्डर्सलाई ६ विकेटले पराजित गरेको छ ।
थन्डर्सले दिएको ९४ रनको लक्ष्य वारियर्सले १८ ओभर १ बलमा ४ विकेट गुमाएर पुरा गर्यो । १५ ओभर ५ बलमा ६७ रन बनाउदा महत्वपूर्ण ४ विकेट गुमाएपनि कप्तान बिबेक यादब र फिर्दोश अन्सारीले पाँचौ विकेटको लागि २७ रनको साझेदारी गर्दै टिमलाई जित दिलाए ।
त्यस्तै ओपनिङ्ग ब्याट्सम्यान प्रशान्त राईले ३१ रन बनाउदा पुष्प थापाले ११ र हरिशंकर साह र हसिम अन्सारी समान ७-७ रन जोडे । थन्डर्सका बलर नन्दन झाले २ विकेट लिए।
यसअघि टस जितेर पहिले ब्याटिङ गरेको थन्डर्सले निर्धारित २० ओभरमा ८ विकेट गुमाएर ९३ रन बनाएको थियो । थन्डर्सका बिक्रम भुसालले २६ रन जोड्दा अंकित सुबेदीले १५ तथा सन्दिप ढुंगानाले १० रन बनाए । वरियर्सका उपेन्द्र रोय र बिबेक यादबले समान २/२ विकेट लिए।
प्रतियोगितामा वारियर्सको यो लगातार तेस्रो जित हो। ३ टोली सहभागी लिगको अन्तिम खेल तिलाठी कोइलाडीसंग खेल्न बाँकी रहँदै वारियर्सले शीर्ष स्थान ओगटेको छ । ४ खेल खेल्दा २ जित र २ हार बेहोरेको थन्डर्सले मंगलबार हुने फाइनलमा वारियर्ससंग नै खेल्ने छ ।
