राजबिराज । मेयर कप सप्तरी प्रिमियर लिग क्रिकेटमा आइतबार बोदे बर्साइन थन्डर्सले तिलाठी कोइलाडीलाई ५ विकेटले हराएको छ ।
कोइलाडीले दिएको १६४ रनको लक्ष्य थन्डर्सले २० ओभरमा ५ विकेट गुमाएर पुरा गर्यो । अन्तिम बलमा ५ रन आवश्यक हुँदा रोबिन सिंहले छक्का प्रहार गर्दै थन्डर्सलाई जित दिलाए ।
अन्तिम ओभरमा थन्डर्सलाई खेल जित्न ७ रन आवश्यक थियो । अन्तिम ओभर बलिङ्ग गर्न आएका रासिद खानले पहिलो बलमा श्रवन यादबलाई रन आउट गराए । त्यसपछि राशिदले लगातार २ बलमा रन दिएनन् भने त्यसपछि चौथो र पाँचौ बलमा १/१ रन बाईको रुपमा रासिदले खर्चिंदा अन्तिम बलमा जितको लागि ५ रन चाहिएको थियो ।
अन्तिम बलमा सिंहले डिप-मिड विकेटको माथिबाट छक्का प्रहार गर्दै टोलीलाई अपत्यारिलो जित दिलाए। यस्तै थन्डर्सको लागि सन्दिप ढुंगानाले ४०, अंकित सुबेदीले ४५ तथा सिद्धान्त लोहनीले ४४ रन बनाए ।
यसअघि पहिले ब्याटिङ गरेको कोइलाडीले पुरै २० ओभर खेल्दै ६ विकेट गुमाएर १६३ रन बनाएको थियो । उसका कप्तान मेहबुब आलमले ७६ रन बनाए । यस्तै राहुल मण्डलले २६ तथा राशिद खानले १६ रन योगदान दिए । बर्साइनका नन्दन झाले ३ तथा सन्दिप ढुंगानाले २ विकेट हात पारे ।
योसंगै कोइलाडीले प्रतियोगितामा लगातार ३ हार बेहोरेको छ । र, उसको फाईनल पुग्ने सम्भावना सकिएको छ । यता, बोदे बर्साइन र खडक वारियर्स फाईनल पुग्ने पक्का भएको छ। ३ खेल खेलेको बोदेले २ जित र १ हार बेहोरेको छ भने २ खेल खेलेको बजाज खडक वारियर्सले दुवै जित हात पारेको छ।
सप्तरी क्रिकेट संघको आयोजना जारी प्रतियोगितामा सोमबार बोदे बर्साइन थन्डर्स र बजाज खडक वरियर्सले खेल्ने छन् ।
