एजेन्सी । उनको कपाल लामो थियो अनि घुमाउरो पनि ।
एक हिसावमा त्यसलाई ‘कर्ली’ भने नि हुन्छ ।
पहिलो पटक देख्दा जो कोहीलाई उनी ‘युनिक’ लाग्छ ।
अझ उनको बलिङकाे बिशेष चर्चा हुने गर्छ ।
यत्ति भनेपछि क्रिकेट हेर्न बानी परेका जो कोहीले उनलाई चिन्छन् । जसले चिन्दैनन्, उनीहरुलाई श्रीलंकाका लिजेण्ड तथा योर्कर किङ मानिने लासिथ मालिंगा भनेर चिनाउन पर्छ ।
मालिंगाले केही दिन अघि मात्र एक दिवसीय क्रिकेटबाट सन्यास लिए ।
बंगलादेशविरुद्द घरेलु मैदानमा एक दिवसीय क्रिकेटबाट बिदा लिदा उनको अनुहार बलेको थियो । उनको अनुहारमा कुनै गुनासा थिएनन् । उनी तृप्त देखिन्थे । एक दिवसीय खेल जिवनबाट उनी सन्तुष्ट थिए ।
मालिंगा खेलाडीनै त्यस्तै हुन्, जस्तो सुकै दबाबमा समेत मुस्कुराउन नभुल्ने । सायदै उनी रिसाएको भेटिन्छन् ।
मालिंगाले २ सय २६ एक दिवसीय खेलमा ३ सय ३८ विकेट हात पारे । एक दिवसीय क्रिकेटबाट बिदा लिदै गर्दा उनी एक दिवसीय क्रिकेटमा सर्वाधिक विकेट लिने विश्वका नवौं खेलाडीकाे रुपमा रहे ।
मालिंगाको अझ बढी याद सन् २००७ को विश्वकपलाई लिएर गरिनेछ । त्यो विश्वकपमा उनका रोमाञ्चक किस्सा जोडिएका छन् ।
वेस्ट ईन्डिजमा भएको श्रीलंका र दक्षिण अफ्रिकाको खेल सायदै क्रिकेट समर्थकले भुल्नेछन् । खेलको अन्तिम समय निकै रोमाञ्चक बनाएका थिए मालिंगाले ।
टस जितेर पहिले ब्याटिङ गरेको श्रीलंका ४९ ओभर ३ बलमा २ सय ९ रनमा समेटिएको थियो । २ सय १० रनको लक्ष्य पछ्याएको दक्षिण अफ्रिकाले ४४ ओभरमा ५ विकेट गुमाएर २ सय रन बनाएको थियो ।
दक्षिण अफ्रिकाका खेलाडी तथा समर्थकले विजय उत्सवको तयारी सुरु गरिसकेका थिए ।
नगरुन पनि किन ?
३६ बल बाँकी थियो । हातमा ५ विकेट थियो । मात्र १० रन चाहिएको थियो ।
४५ औं ओभरमा मालिंगाले व्यक्तिगत सातौँ ओभर बलिङ गर्न आएका थिए । त्यस पछि के भयो ?
एक हिसावले बाँकी सबै चिज एकादेशको कथा जस्तै बन्यो ।
उनले पहिलो बल डट फाले । दोस्रो बलमा चौका खाए । तेस्रो बल समेत डट फाले । चौथो बलमा अफ्रिकी टिमले दुई रन बटुलेको थियो ।
अब दक्षिण अफ्रीकालाई जितका लागि ४ रन मात्र चाहिने समिकरण तय थियो । पाँचौ बलमा मालिंगाले योर्कर फाल्दै शौन पोल्लकलाई बोल्ड गरे ।
ओभरको अन्तिम बलमा एण्ड्रियु हललाई 'क्याच आउट' गराए ।
खेल श्रीलंकाको हातमा थिएन । तर दक्षिण अफ्रिकाले केही दबाब महशुश गरेकाे थियो ।
४६ औ ओभरमा चामिन्दा भासले मात्र एक रन दिए । ज्याक कालिसले ओभरको पहिलो बलमा १ रन बनाएका थिए ।
मलिंगा आफ्नो अन्तिम ओभर लिए आए ।
दक्षिण अफ्रिकी ब्याट्सम्यान कालिस १ सय १० बलमा ८६ रन बनाएर खेलिरहेका थिए । पहिलो बलमै कालिसलाइ बिकेट किपरबाट 'क्याच आउट' गराउँदै मालिंगाले ह्याट्रिक पुरा गरे । लगत्तै अर्को बलमा नितिनलाई योर्कर मार्फत बोल्ड गराउँदै उनले ४ बलमा लगातार ४ विकेट हात पारे ।
एक समय मालिंगाले श्रीलंकालाई खेलमा फर्काएका थिए ।
दक्षिण अफ्रिकालाई १ विकेटको भरमा ३ रन चाहिने अवस्था थियो । खेल निकै रोमाञ्चक मोडमा पुगेको थियो ।
मालिंगाले बाँकी ४ बलमा १ रन दिए । र आफ्नो जिवनको उत्कृष्ट खेलको रुपमा समयलाई आत्मसाथ गरे । सायद समर्थकका लागि समेत त्यो खेल जिवनकै उत्कृष्ट खेल मध्यकै एक हुनुपर्छ ।
अन्तिममा खेल दक्षिण अफ्रिकाले १ विकेटले हात पार्यो । तर म्यान अफ द म्याच दक्षिण अफ्रिकाका चार्ल ल्याङभेल्ड र मालिंगा संयुक्त रुपमा घोषित थिए ।
विश्वकपमा ४ बलमा ४ विकेट हात पार्ने मालिंगा एक्लो खेलाडी हुन् । मालिंगा हरेक बलमा योर्कर फाल्न सक्ने खेलाडीको रुपमा स्थापित छन् । हातको १८० कोणबाट बलिङ गर्ने क्षमता बोकेका मालिंगालाई झेल्न कुनैपनि ब्याट्सम्यानलाई मुस्किल हुन्छ ।
उनले एक्लो बलमा श्रीलंकालाई धेरै खेल जिताएका छन् ।
मालिंगा विश्वकप इतिहासमा दुई पटक ह्याट्रिक लिने एक्लो खेलाडी हुन ।
सन् २०११ को विश्वकपमा केन्याविरुद्ध ह्याट्रिक लिंदै मालिंगा विश्वकपमा दुई ह्याट्रिक विकेट लिने पहिलो खेलाडी बनेका थिए ।
मालिंगाको नेतृत्वमा श्रीलंकाले सन् २०१४ को विश्व टी–ट्वान्टी उपाधि जितेको थियो । सन् २०११ को एक दिवसीय विश्वकपको फाइनलमा भारतसंगको हारको बदला लिदै श्रीलंकाले उपाधि उचालेको थियो ।
