काठमाडौं । आईसीसी टी-ट्वान्टी विश्वकप छनोट अन्तर्गतको एसिया फाइनलको अन्तिम खेलमा घरेलु टोली सिंगापुरसँग पराजित भएसंगै सन् २०२० को टी-ट्वान्टी विश्वकप खेल्ने नेपालको सपना सकिएको छ ।
ईण्डियन एसोसियसन क्रिकेट मैदानमा आइतबार भएको अन्तिम खेलमा नेपाल सिंगापुरसँग ८२ रनको फराकिलो अन्तरले पराजित भएको थियो ।
यो हारसँगै प्रतियोगितामा नेपाल ४ खेलमा २ जितर २ हार व्यहोर्दै तेस्रो स्थानमा रह्यो । प्रतियोगितामा नेपाल पहिलो खेलमा कतारसँग ४ विकेटले पराजित भएको थियो । तर, नेपालले दोस्रो खेलमा मलेसियालाई ७ विकेट तथा तेस्रो खेलमा कुवेतलाई ७ विकेटले पराजित गरेको थियो ।
प्रतियोगितामा उपाधि दाबेदार मानिएको नेपालले खराब प्रदर्शन गरेपछि चर्चाको बिषय बनेको छ । किनकी प्रतियोगितामा सहभागी राष्ट्रमध्ये नेपाल सर्वाधिक शीर्ष वरियतामा रहेको थियो ।
तर, प्रतियोगितामा नेपालका खेलाडीले सोचेको जस्तो प्रदर्शन गर्न सकेनन् । प्रतियोगितामा धेरै कीर्तिमान बनाएपनि नेपाल धेरै कुरामा चुकेको थियो । नेपालको बलिङ र ब्याटिङ दुवै उत्कृष्ट हुन सकेन ।
प्रतियोगितामा नेपालका धेरै खेलाडी उच्च प्रदर्शन गर्न चुके । प्रतियोगितामा उत्कृष्ट प्रदर्शन गर्न चुकेका पाँच स्टार खेलाडीको हामीले चर्चा गरेका छौं ।
१. शरद भेषवाकर
नेपाली ब्याटिङको खम्बा भनेर चिनिने शरदले प्रतियोगिताभर १ खेलमा मात्र दोहोरो अंक जोड्न सके । उनले प्रतियोगितामा ४ खेल खेल्दै मात्र ५५ रन बनाए । प्रतियोगितामा सर्वाधिक रन बनाउने खेलाडीको सूचीमा उनी २० औं स्थानमा रहे ।
पहिलो खेलमा कतारविरुद्ध १३ बलमा ७ रन बनाएका शरदले मलेसियाविरुद्ध २ बलमा ३ रन बनाउँदा अविजित रहेका थिए ।
यस्तै कुवेतविरुद्ध भने उनले औषत प्रदर्शन गरे । ३० बल खेलेका शरदले ३८ रनमा अविजित रहँदै नेपाललाई जित दिलाए ।
अन्तिम तथा महत्वपूर्ण रहेको सिंगापुरविरुद्धको खेलमा ११ बल खेल्दा ७ रनमा क्याच आउट भए । आउट भएको दुवै खेलमा उनी खराब सटका कारण क्याच आउट भएका थिए । उनी जस्तो अनुभबी तथा तेस्रो नम्बरमा ब्याटिङ आउने खेलाडीबाट यस्तो प्रदर्शन हुनु खराब नै हो ।
२. दिपेन्द्र सिंह ऐरी
युवा तथा भरपर्दा मिडल अर्डर ब्याट्सम्यानको रुपमा आफुलाई स्थापित गर्दै आएका दिपेन्द्रलाई भविष्यका मुख्य खेलाडीको रुपमा हेरिएको छ । तर, प्रतियोगितामा भने उनको ब्याटिङ चल्न सकेन । ४ खेलमा ६० रन बनाएका उनी प्रतियोगितामा सर्वाधिक रन बनाउने खेलाडीको सूचीको १७ औं स्थानमा रहेका छन् ।
कतारविरुद्ध ३५ बलमा ३४ रन बनाएका उनले मलेसियाविरुद्ध ४ बलमा २, कुवेतविरुद्ध २ बलमा १ र सिंगापुरविरुद्ध २२ बलमा २३ रन बनाएर आउट भएका थिए । यसै बर्षको पीएम कपको फाइनलमा औंलामा चोट लागेका कारण उनी केहि महिना मैदान बाहिर रहेका थिए ।
३. सोमपाल कामी
नेपालका भरपर्दा अलराउण्डर सोमपालले यस प्रतियोगितामा सम्झन लायक प्रदर्शन गर्न सकेनन् । प्रतियोगितामा न त उनको ब्याट चल्यो न त बलिङ नै । प्रतियोगितामा २ इनिङ्स ब्याटिङ गरेका उनले दुवै खेलमा ११/११ रन बनाएर पेभिलियन फर्किएका थिए । बलिङतर्फ मलेसियाविरुद्दको खेलमा ३ विकेट बाहेक अन्य खेलमा विकेट लिन सकेनन् ।
विदेशी फ्रेन्चाइज लिग खेल्ने सोमपाल नेपालका दोस्रो खेलाडी हुन् । क्यानडामा जारी ग्लोबल टी-ट्वान्टीमा विनिपेग हक्सले ३ हजार अमेरिकी डलरमा अनुबन्धन गरेको थियो । प्रतियोगिता २५ जुलाईबाट सुरु भए पनि नेपालको खेलका कारण उनी आइतबार बेलुका क्यानडा प्रस्थान गर्ने छन् ।
४. विनोद भण्डारी
नेपाली क्रिकेटमा कसैले पूर्ति गर्न नसकेको एक स्थान हो विकेटकिपर ब्याट्सम्यान । तर, विनोद भण्डारीको पीएम कप र मलेसियाविरुद्धको सिरिजमा देखिएको लय सिंगापुरमा देख्न सकिएन ।
प्रतियोगितामा उनले राम्रो प्रदर्शन गर्ने सबैले आशा गरेको थियो । तर, विनोदले ३ इनिङ्समा मात्र २५ रन बनाए । मलेसियाविरुद्ध १३ रन बनाउनु बाहेक अन्य खेलमा उनले दोहोरो अंक छुन सकेनन् ।
प्रतियोगिताको तयारीको रुपमा मलेसियाविरुद्धको खेलमा उनले २५ बलमा ५१ रनको कीर्तिमानी अर्धशतकीय इनिङस खेलेका थिए ।
५. रोहित कुमार पौडेल
नेपाली ब्याटिङमा युवा तथा भरपर्दा ब्याट्सम्यानको रुपमा स्थापित गरिसकेका रोहितले प्रतियोगितामा उत्कृष्ट खेल देखाउन सकेनन् । प्रतियोगितामा ३ खेल खेलेका उनले २ इनिङ्स ब्याटिङ गरेका थिए ।
कुवेतविरुद्ध ९ बलमा ६ रन बनाउँदै अविजित रहेका उनले सिंगापुरविरुद्ध ४ बल खेल्दा ५ रनमा आउट भएका थिए ।
