काठमाडौं । राजविराजमा जारी मेयर कप सप्तरी प्रिमियर लिग प्रतियोगितामा बजाज खडक वारियर्सले लगातार दोस्रो जित निकालेको छ । शनिबार भएको खेलमा वारियर्सले तिलाठी महिन्द्रा हिरोजलाई ७ विकेटले पराजित गरेको छ।
पब्लिक विन्देश्वरी मैदानमा हिरोजले दिएको ९१ रनको लक्ष्य वारियर्सले १० ओभर १ बलमा ३ विकेट गुमाएर पुरा गर्यो । वारियर्सको जितमा अविजित ५८ रन बनाएका अन्सारीले २६ बलमा ६ छक्का र ३ चौका प्रहार गरे । तिलाठी बलर संसाद शेखले २ विकेट लिए।
यसअघि टस हारेर ब्याटिङ्ग गरेको मेहबुब आलमको कप्तानीमा रहेको तिलाठीले २० ओभरमा अलआउट हुँदै ९० रन बनाएको थियो । उसको लागि विकास दासले सर्वाधिक २८ रन, मेहबुब आलमले १६ तथा अमित यादबले ११ रनको योगदान दिए । वारियर्सका गोमानंद अमथ र हरि शंकर शाहले ३/३ विकेट विकेट लिए।
प्रतियोगितामा वारियर्सको यो दोस्रो जित हो भने हिरोजको यो लगातार दोस्रो हार हो । ३ टिम सहभागी लिगमा बोदे बर्साइन थन्डर्सले पनि २ खेल खेल्दा १ जित र १ हार बेहोरेको छ । प्रतियोगिता अन्तर्गत आइतबार तिलाठी महिन्द्रा हिरोज र बोदे बर्साइन थन्डर्स प्रतिस्पर्धा गर्नेछन्।
