काठमाडौं । सिंगापुरमा जारी आईसीसी टी–ट्वान्टी विश्वकप छनोट अन्तर्गतको एसिया फाइनलमा नेपालले बुधबार पहिलो जित निकाल्यो ।
ईण्डियन एसोसियसन क्रिकेट मैदानमा नेपालले चिपरिचित प्रतिद्वन्दी मलेसियालाई ७ विकेटले पराजित गर्दै पहिलो जित निकालेको थियो ।
मलेसियाविरुद्धको जितसँगै नेपालले एसिया फाइनलको उपाधि जित्दै ग्लोबल छनोटमा पुग्न सम्भावना कायम राखेको छ । मलेसियामाथिको जितसँगै नेपालले कीर्तिमान समेत बनाएको छ ।
मलेसियाविरुद्ध वर्षाले प्रभावित हुँदा खेल ९ ओभरमा झारिएको थियो । नेपाललाई मलेसियाले जितका लागि ८४ रनको उच्च लक्ष्य दिएको थियो । यस्तोमा नेपाल गर या मरको स्थितिमा रहेको थियो ।
तर, पारस खड्का घाइते भएपछि नेपाली टिमको कप्तानी गरेका ज्ञानेन्द्र मल्ल चम्किएपछि नेपालले मलेसियालाई ७ विकेटले पराजित गरेको थियो । मलेसियाले दिएको ८४ रनको लक्ष्य नेपालले ८ ओभरमा मात्र ३ विकेट गुमाएर पुरा गरेको थियो ।
मलेसियाविरुद्ध बनेको कीर्तिमान कस्तो ?
१.सर्वाधिक छिटो अर्धशतक -
मलेसियाविरुद्ध कप्तानी गरेका ज्ञानेन्द्र मल्लले टी-ट्वान्टी अन्तराष्ट्रियमा आफ्नो करियरकै उत्कृष्ट प्रदर्शन गरे । जसको कारण नेपालले मलेसियालाई हराउन सफल भयो ।
मलेसियाविरुद्ध मल्लले २० बलमा ५१ रन जोड्दै अर्धशतक बनाउदा नेपालको जित सहज बनेको थियो । विस्फोटक ब्याटिङ गरेको मल्लले ५ चौका र ३ छक्का प्रहार गरेका थिए ।
मलेसियासँगको अर्धशतकसँगै मल्लले अन्तराष्ट्रिय टी-ट्वान्टीमा नेपालबाट सर्वाधिक चाँडो अर्धशतक बनाउने खेलाडीको कीर्तिमान बनाए । उनले विनोद भण्डारीको नाममा रहेको कीर्तिमान भङ्ग गरे ।
यसअघि विकेटकिपर ब्याट्सम्यान विनोद भण्डारीले गत साता मलेसियाविरुद्धको सिरिजको अन्तिम तथा दोस्रो खेलमा कीर्तिमान बनाएका थिए । उक्त खेलमा भण्डारीले २५ बलमा ५ छक्का र ३ चौका प्रहार गर्दै अविजित ५१ रनको अर्धशतकीय इनिङ्स खेलेका थिए ।
मलेसियाविरुद्ध अर्धशतक बनाएसँगै मल्ल अन्तराष्ट्रिय टी-ट्वान्टीमा अर्धशतक बनाउने पाँचौं नेपाली खेलाडी बने । र, अन्तराष्ट्रिय टी-ट्वान्टीमा नेपाली खेलाडीले बनाएको छैटौं अर्धशतक हो ।
यसअघि पारस खड्काले दुई पटक, सुवास खकरेल, विनोद भण्डारी र सन्दीप जोराले अन्तराष्ट्रिय टी-ट्वान्टीमा समान १/१ पटक अर्धशतक बनाएका छन् । यसअघि पारसले ३२ बल, सुवासले ४८ बल र सन्दीपले ४१ बलमा अर्धशतक बनाएका थिए ।
२. ओपनिङमा कीर्तिमानी साझेदारी
मलेसियाविरुद्ध नेपालले ज्ञानेन्द्र मल्ल र प्रदिप ऐरीलाई ओपनिङ जोडीको रुपमा क्रिज पठाएको थियो । र, ओपनरद्वय ज्ञानेन्द्र र प्रदिपको जोडीले उत्कृष्ट प्रदर्शन गरेपछि नेपालको जित सम्भव भएको थियो ।
ज्ञानेन्द्र र प्रदिपले मलेसियाविरुद्ध पहिलो विकेटका लागि कीर्तिमानी साझेदारी नै गरे । पहिलो विकेटका लागि दुवैले ६६ रनको साझेदारी गरेका थिए । जुन टी-ट्वान्टी अन्तराष्ट्रिय क्रिकेटमा नेपालबाट पहिलो विकेटका लागि सर्वाधिक रनको साझेदारी हो ।
पहिलो विकेटको रुपमा मल्ल २१ बलमा ५ चौका र ३ छक्कासहित ५१ रनमा क्याच आउट भए । यस्तै अर्का ओपनर प्रदिप १४ बलमा १ चौकासहित १२ रन बनाएर पेभिलियन फर्किए ।
यसअघि मंगलबार कतारविरुद्ध कप्तान पारस खड्का र ज्ञानेन्द्रले ४९ रनको साझेदारी गर्दै कीर्तिमान बनाएका थिए ।
यस्तै नेपालले पछिल्लो पाँच अन्तराष्ट्रिय टी-ट्वान्टीमा फरक फरक ओपनरको प्रयोग गरेको छ । गत माघमा युएईसँग भएको सिरिजबाट नेपालले कुनै पनि खेलमा दोहोरिएर ओपनर जोडी पठाएको छैन ।
३. सर्वाधिक विकेट
मलेसियाविरुद्ध सोमपाल कामीले ३ विकेट लिए । र, सोमपालले नेपालका लागि टी-ट्वान्टी अन्तराष्ट्रियमा सर्वाधिक विकेट लिने खेलाडीको कीर्तिमान बनाए ।
सोमपालले बसन्त रेग्मीको रेकर्ड तोडेका हुन् । १९ टी-ट्वान्टी अन्तराष्ट्रिय खेलमा सोमपालले २३ विकेट हात पारेका छन् । बसन्तले १६ खेलमा २२ विकेट लिएका छन् ।
सोमपालले मलेसियाविरुद्ध २३ रन खर्चेर ३ विकेट हात पारेका थिए । जुन बलिङ फिगर सर्वाधिक राम्रो फिगर हो ।
टी -ट्वान्टीमा करण केसीले १३ खेलमा १५ विकेट लिएका छन् । यस्तै सन्दीप लामिछानेले ८ खेलमा १३ विकेट हात पारेका छन् ।
-1736300843.webp)
-1736300867.jpg)
-1736261934.jpeg)
