काठमाडौं । नेपालले घरेलु टोलि मलेसियाविरुद्वको दुई खेलको टी–ट्वान्टी अन्तराष्ट्रिय क्रिकेट सिरिजमा 'क्लिन स्विप' गरेको छ ।
आइतबार भएको दोस्रो खेलमा मलेसियालाई ६ रनले हराउँदै नेपालले सिरिजमा ऐतिहासिक क्लिन स्विप गरेको हो । शनिबार भएको पहिलो खेलमा नेपालले मलेसियालाई ७ विकेट पराजित गरेको थियो ।
मलेसियाविरुद्ध नेपालले ऐतिहासिक सिरिजमा क्लिन स्विप मात्र गरेन । अन्य थुप्रै कीर्तिमानहरु बनाएको छ ।
नेपालले मलेसियाविरुद्धको सिरिजमा बनाएको पाँच कीर्तिमानहरु यस प्रकार रहेको छ ।
१. टी-ट्वान्टी अन्तराष्ट्रियमा दुई अर्धशतक (पारस खड्का)
शनिबार भएको पहिलो खेलमा नेपालले मलेसियालाई ७ विकेटले पराजित गर्दा कप्तान पारस खड्काले किर्तिमानी प्रदर्शन गरे ।
उक्त खेलमा ५० बलमा ८ चौका र ५ छक्का प्रहार गरेका कप्तान पारसले अविजित रहदै ८६ रनको अर्धशतकीय इनिङ्स खेलेका थिए ।
पहिलो खेलमा अर्धशतक बनाएसँगै कप्तान पारस अन्तराष्ट्रिय टी-ट्वान्टीमा दुई अर्धशतक बनाउने पहिलो नेपाली खेलाडी बने । हालसम्म पारस बाहेक अन्य नेपाली खेलाडीले टी-ट्वान्टीमा दुई अर्धशतक बनाएको छैन ।
यसअघि कप्तान पारसले सन् २०१५ मा भएको नेदरल्याण्डविरुद्धको सिरिजमा ४० बलमा ५४ रनको अर्धशतकीय इनिङ्स खेलेका थिए ।
नेपालबाट हालसम्म टी-ट्वान्टी अन्तराष्ट्रियमा पारससँगै सुवास खकुरेल, सन्दीप जोरा र विनोद भण्डारीले अर्धशतक बनाएका छन् ।
सुवासले सन् २०१४ को टी-ट्वान्टीमा विश्वकपमा अफगानिस्तानविरुद्ध ५६ रन बनाएका थिए । सुवास अन्तराष्ट्रिय टी-ट्वान्टीमा अर्धशतक प्रहार गर्ने पहिलो नेपाली खेलाडी समेत हुन् ।
यस्तै गत माघमा युएईविरुद्धको अन्तराष्ट्रिय टी-ट्वान्टीमा सिरिजमा सन्दीप जोराले कीर्तिमानी अर्धशतक प्रहार गरेका थिए । डेब्यु खेलमा अविजित ५३ रन प्रहार गरेका जोरा अन्तराष्ट्रिय टी-ट्वान्टीमा सबै भन्दा कम उमेरका खेलाडी हुन् ।
विनोदले आइतबार मलेसियासँगको खेलमा अविजित रहदै ५१ रनको अर्धशतकीय इनिङ्स खेल्दै टी-ट्वान्टीमा अर्धशतक बनाउने चौंथो खेलाडी बनेका थिए ।
२. टी-ट्वान्टी अन्तराष्ट्रियमा सर्वाधिक छिटो अर्धशतक (विनोद भण्डारी)
विकेटकिपर ब्याट्सम्यान विनोद भण्डारीले आइतबार भएको अन्तिम तथा दोस्रो खेलमा विस्फोटक ब्याटिङ गरे ।
भण्डारीले २५ बलमा ५ छक्का र ३ चौका प्रहार गर्दै अविजित ५१ रनको अर्धशतकीय इनिङ्स खेले । यो अर्धशतकसंगै भण्डारी अन्तराष्ट्रिय टी ट्वान्टीमा नेपालबाट सर्वाधिक चाँडो अर्धशतक बनाउने खेलाडीको कीर्तिमान बनाए ।
यस्तै भण्डारी अर्धशतक प्रहार गर्ने चौथो नेपाली खेलाडी बने । चौथो खेलाडी बनेपनि उनको अर्धशतक नेपालका लागि पाचौं हो । यस अघि पारस खड्काले दुई पटक, सुवास खकरेल र सन्दीप जोराले अन्तराष्ट्रिय टी ट्वान्टीमा समान १/१ पटक अर्धशतक बनाएका छन् ।
यसअघि पारसले ३२ बल, सुवासले ४८ बल र सन्दीपले ४१ बलमा अर्धशतक बनाएका थिए ।
३.टी-ट्वान्टी अन्तराष्ट्रियमा सर्वाधिक स्कोर
नेपालले आइतबार मलेसियाविरुद्ध १७३ रन बनाएको थियो । र, नेपालले बनाएको यो स्कोर अन्तराष्ट्रिय टी-ट्वान्टीमा बनाएको सर्वाधिक उच्च रन हो ।
यसअघि सन् २०१४ को आईसीसी टी-ट्वान्टी विश्वकपमा हङकङविरुद्ध नेपालले बनाएको १४९ रन सर्वाधिक रन थियो । हङकङविरुद्ध नेपालले २० ओभरमा ३ विकेट गुमाउँदै १४१ रन बनाएको थियो ।
४. टी-ट्वान्टीमा क्लिन स्विप
मलेसियाविरुद्ध दुई खेलको टी-ट्वान्टी अन्तराष्ट्रिय सिरिज २-० ले जित्दै नेपालले ऐतिहासिक सफलता प्राप्त गर्यो । नेपालले यसअघि टी-ट्वान्टी अन्तराष्ट्रिय सिरिज जितेपनि क्लिन स्विप गरेको थिएन ।
नेपालले अहिलेसम्म ४ अन्तराष्ट्रिय टी-ट्वान्टी सिरिज खेलेको छ । सन् २०१४ को आईसीसी टी-ट्वान्टी विश्वकपपछि नेपालले २ बर्षको लागि टी-ट्वान्टीमा मान्यता पाएको थियो ।
त्यसबीचमा नेपालले पहिलो पटक हङकङसंग ५ खेलको सिरिज खेलेको थियो । ४ खेल खराब मौशम कारण हुन सकेन र एक खेलमा नेपाल पराजित हुँदै सिरिज गुमाएको थियो ।
सन् २०१५ मा नेदरल्याण्डविरुद्ध नेपालले ४ खेलको अन्तराष्ट्रिय टी-ट्वान्टी सिरिज खेल्यो । उक्त सिरिज नेपालले ३-१ ले गुमाएको थियो ।
यस्तै नेपालले एकदिवसीय अन्तराष्ट्रिय मान्यता पाएपछि गत माघमा घरेलु टोली युएईविरुद्धको टी-ट्वान्टी सिरिज २-१ ले जित्दै ऐतिहासिक सिरिज हात पारेको थियो ।
५. टी-ट्वान्टी अन्तराष्ट्रियमा व्यक्तिगत उच्च स्कोर (पारस खड्का)
नेपालका कप्तान पारस खड्काले मलेसियाविरुद्धको पहिलो खेलमा विस्फोटक ब्याटिङ गरे । कप्तान पारसले ५० बलमा ८ चौका र ५ छक्का प्रहार गर्दै अविजित ८६ रन बनाए ।
उक्त इनिङ्ससंगै कप्तान पारस अन्तराष्ट्रिय टी-ट्वान्टीको एकै इनिङ्समा व्यक्तिगत सर्वाधिक रन बनाउने पहिलो नेपाली खेलाडी बने । यसअघि सुवास खकुरेलले सन् २०१४ को टी-ट्वान्टी विश्वकपमा अफगानिस्तानविरुद्ध बनाएको ५६ रन उच्च स्कोर रहेको थियो । जुन कप्तान पारसले ५ बर्षपछि तोडेका छन् ।
-1736042125.webp)
