काठमाडौं । सन् २०१८ मार्च १५, जिम्बाबे ।
हरारेमा जारी एकदिवसीय विश्वकप छनोटबाट नेपाल बाहिरिसकेको थियो । सुपर सिक्समा पर्न असफल भएपछि नेपालको विश्वकप खेल्ने सपना सकिएको थियो ।
तर, नेपालको लागि एक ऐतिहासिक सफलताको अवसर भने बाँकी थियो । त्यो थियो, 'एकदिवसीय अन्तराष्ट्रिय राष्ट्र' को मान्यता प्राप्त गर्ने अवसर ।
जसका लागि नेपाललाई छनोटको शीर्ष आठ भित्र पर्नु पर्ने बाध्यता थियो । यस्तोमा नेपाललाई एक जितले मात्र पुग्दैन थियो । अर्को खेलमा नेपाललाई अनुकुल हुनेगरि नतिजा आउनु पर्ने थियो ।
मार्च १५ अर्थात आजकै दिन प्ले अफमा नेपालले पपुवा न्युगिनीसंग खेल्दै थियो । अर्को खेलमा नेदरल्याण्ड्स र हङकङबीचको खेल हुँदै थियो ।
प्लेअफमा नेपालले बलियो टोली पपुवा न्यूगिनीलाई सहजै ६ विकेटले पराजित गर्यो । पपुवा न्युगिनीलाई पराजित गरेपनि नेपालको एकदिवसीय अन्तराष्ट्रिय मान्यता निश्चित थिएन । अब नेपाललाई नेदरल्याण्ड्स र हङकङबीचको खेलमा आफु अनुकुल नतिजाको खाचो रह्यो ।
नेपाललाई भाग्यले पनि साथ दियो । उक्त खेलमा नेदरल्याण्ड्सले हङकङलाई ४४ रन पराजित गर्यो । र, नेपालले शीर्ष आठ भित्र पर्दै चार बर्षको लागि एकदिवसीय अन्तराष्ट्रिय मान्यता प्राप्त गर्यो । यदि हङकङले नेदरल्याण्ड्सलाई हराएको भए नेपालको एकदिवसीय सपना केहि बर्ष लम्बिने थियो ।
अन्तराष्ट्रिय क्रिकेटमा पाइला चालेको २२ बर्षपछि नेपाली क्रिकेटले उक्त ऐतिहासिक सफलता पाएको थियो । उक्त सफलता नेपाली क्रिकेट र खेलकुद जगतले सधै सम्झने गर्छ ।
उक्त सफलताले सारा नेपालीलाई खुसी दिलाएको थियो । त्यसैले नेपाली खेलप्रेमीले मार्च १५ लाई सधै सम्झने गर्छ ।
एकदिवसीय मान्यता पाएको एक बर्षभित्र नेपालले एकदिवसीय र टी-ट्वान्टी सिरिज जितिसकेको छ । नेपालले दुई एकदिवसीय सिरिज खेल्दा एक सिरिज जितेको हो ।
गत महिना नेपालले युएईविरुद्ध एकदिवसीय र टी-ट्वान्टी सिरिज जितेर एकदिवसीय मान्यताको सार्थकता पुरा गरिसकेको छ ।
पपुवा न्युगिनीविरुद्धको त्यो खेल -
पपुवा न्यूगिनीविरुद्धको खेलमा नायक थिए - युवा खेलाडी दिपेन्द्र सिंह ऐरी । दिपेन्द्रले उत्कृष्ट अलराउण्ड प्रदर्शन गर्दै नेपाललाई सहज जित दिलाएका थिए ।
उनले बलिङतर्फ ४ विकेट हात पार्दा ब्याटिङमा पनि अर्धशतकीय इनिङ्स खेल्दै म्यान अफ दि म्याच घोषित भएका थिए ।
जिम्बाबेको हरारेमा टस जितेर बलिङ रोजेको नेपालले पपुवा न्यूगिनीलाई सुरुवातबाटै दबाबमा राखेको थियो । जसको कारण पपुवा न्युगिनी २७ ओभर २ बलमा अलआउट हुँदै ११४ रनमा समेटिएको थियो ।
पपुवा न्युगिनीलाई ससतैमा समेट्न दिपेन्द्रले ४ ओभर २ बलमा १४ रन खर्चेर ४ विकेट लिए । यस्तै सन्दीप लामिछानेले २९ रन खर्चिएर ४ विकेट हात पार्दा सोमपाल कामी र करण केसीले एक एक विकेट लिएका थिए ।
पपुवा न्युगिनीबाट पाएको ११५ रनको सामान्य लक्ष्य पछ्याएको नेपाल पनि सुरुवातमै धर्मराएको थियो । मात्र ९ रन जोड्दा ज्ञानेन्द्र मल्ललाई १ रनमा गुमाएको नेपालले ३५ रन जोड्दा तेस्रो विकेटको रुपमा कप्तान पारस खड्कालाई २० रनमा गुमाएको थियो ।
तर, दिपेन्द्र र आरिफ शेखले चौथो विकेटको लागि ६७ रनको साझेदारी गर्दै नेपाललाई जितको बाटो देखाए । दिपेन्द्र ५० रनमा अविजित रहदा शेखले २६ रन बनाएर आउट भए ।
उक्त खेलमा अनिल साह ९ रनमा आउट हुँदा रोहित कुमार पौडेलले अविजित ३ रन बनाएका थिए ।
पपुवा न्युगिनीविरुद्ध जितपछि -
पपुवा न्युगिनीलाई हराएर एकदिवसीय मान्यताको आशासहित नेपाली टोली होटलतर्फ लाग्यो । तर, सबैको ध्यान नेदरल्याण्ड्स र हङकङबीचको खेलमा थियो ।
होटल पुगेको केहि बेरमा नतिजा आयो । नतिजा नेदरल्याण्ड्स मात्र नभई नेपालको पक्षमा पनि थियो । नेदरल्याण्ड्सले हङकङलाई ४४ रनले हराएको थियो ।
नेदरल्याण्ड्सले हङकङलाई हराएपछि नेपालले पहिलो पटक एकदिवसीय अन्तराष्ट्रिय मान्यता प्राप्त भएको थियो ।
नेदरल्याण्ड्सले जितेको खबर पाउने बित्तिकै सबै खेलाडीहरु तथा अफिसियलहरु खुसीले रोईरेहका थिए । किनकि सन् १९९६ बाट अन्तर्राष्ट्रिय क्रिकेट खेल्न थालेको नेपालले २२ बर्षपछि एकदिवसीय मान्यता प्राप्त गर्न सफल भएको थियो ।
डिभिजन ५ बाट यात्रा थालेको नेपालले त्यसअघि सन् २०१४ मा विश्वकप छनोट खेल्दै एकदिवसीय मान्यताको लागि प्रयास गरेको थियो । तर, न्यूजिल्याण्डमा भएको उक्त छनोटमा कमजोर प्रदर्शन गरेपछि नेपाल नवौँ स्थानमा सीमित हुँदै डिभिजन ३ मा घटुवा भएको थियो । त्यसबेला हङकङ, युएई, स्कटल्याण्ड र पपुवा न्यूगिनीले एकदिवसीय राष्ट्रको मान्यता प्राप्त गरेका थियो ।
नेपालले एकदिवसीय मान्यता पाएको दिन सम्झदा विश्वकप छनोटसम्म पुर्याउन महत्वपुर्ण भूमिका खेलेका करण केसीलाई समेत सबैले सम्झने गर्छन ।
डिभिजन २ अन्तर्गत क्यानडाविरुद्धको खेलमा १ विकेटको सनसनी जितमा करण नायक बनेका बनेका थिए ।
अन्तिम विकेट बाँकी रहदा करणले ३१ बलमा ४२ रनको मद्दतले नेपालले क्यानडालाई हराउँदै डिभिजन एकमा उक्लनुका साथै जिम्बाबेको टिकट काटेको थियो ।
Photo -icc
