काठमाडौं । एक दिवसीय अन्तराष्ट्रिय मान्यता पाएपछि दोश्रो बैदेशिक भ्रमणमा युएई पुगेको नेपालले एक दिवसीय अन्तराष्ट्रिय र टी–ट्वान्टी सिरिज जितेर ईतिहास रच्न सफल भएको छ । युएई भ्रमणमा निकै सुधारिएको प्रर्दशन गर्दै नेपालले ऐतिहासिक सफलता हात पारेको हो ।
मुख्य कुरा नेपालको प्रत्येक जितमा फरक फरकले नायकत्व प्रर्दशन गरे । यसको अर्थ नेपाल अब कुनै १-२ खेलाडीमा भरपर्ने अवस्था छैन । केही युवा खेलाडीले सोचे भन्दा माथिल्लो स्तरको प्रर्दशन गरे । नेपाली क्रिकेटको उज्यालो भविष्यको संकेत गरे ।
एक दिवसीय सिरिज :
घरेलु टोली युएईविरुद्धको तीन खेलको एकदिवसीय क्रिकेट सिरिज २—१ ले जित्दै नेपालले पहिलो पटक ऐतिहासिक सिरिज हात पारेको हो । दुबईस्थित आईसीसी क्रिकेट एकेडेमीमा भएको पहिलो खेलमा ३ विकेटले पराजित भएपनि दोश्रो खेलमा १ सय ४५ रनको फराकिलो जित हात पार्दै नेपालले सिरिजमा उत्कृष्ट पुनरागमन गरेको थियो ।
सिरिज जित्न तेस्रो तथा अन्तिम खेल निर्णायक थियो । चुनौती कडा थियो । जसमा पारस खड्काले शतकिय पाली खले । उनकै नायकत्वमा नेपालले एक दिवसीय सिरिज कब्जा गर्न सफल भयो । एकदिवसीय अन्तराष्ट्रिय क्रिकेटमा शतक बनाउने पारस पहिलो नेपाली खेलाडी समेत हुन् । उनले ९६ बलमा शतक पुरा गरेका थिए । कुल १५६ रन बनाएका उनले ४ विकेट लिए । पारसनै ‘प्लेयर अफ दी सिरिज’ घोषित भए ।
टी–ट्वान्टी सिरिज :
एकदिवसीय सिरिज जितेको नेपाल पहिलो टी–ट्वान्टी सिरिजका लागि उत्साहीत थियो । तर पहिलो खेलमा उसले २१ रनले पराजय ब्यहोर्यो । नेपाल पराजित खेलमा सन्दीप जोराले कीर्तिमान कायम गरे । अन्तराष्ट्रिय टी–ट्वान्टीको डेब्यु खेलमा अर्धशतक बनाउने उनी विश्वकै कान्छा खेलाडी बने । सन्दीपले १७ वर्ष १ सय ३ दिनमा डेब्यु गर्दै ४२ बलमा ५० रन पुरा गरेका थिए ।
दोश्रो खेल जित्दै नेपालले टी–ट्वान्टी सिरिजमा समेत सानदार पुनरागमन जनायो । अघिल्ला खेलमा जम्न नसकेका दिपेन्द्र सिंह ऐरीले शानदार पाली खेले । अघिल्ला क्रमका व्याट्सम्यान सस्तैमा आउट हुदाँ नेपालको धरासायी ईनिङ्सलाई डेब्यु गरेका अलराउण्डर पवन सरार्फले दिपेन्द्रसंग ५५ रनको साझेदारी गरेर साथ दिए । त्यहीनै नेपालको जितको आधार बन्यो । दिपेन्द्रले व्यक्तिगत १ छक्का र ४ चौकाको मद्दतले ४७ रनमा अविजित पाली खेले ।
अन्तिम तथा तेस्रो टी–ट्वान्टीमा १४ रनको जित निकाल्दै नेपालले ऐतिहासिक सिरिज जित्न सफल भएको थियो । बर्षाले प्रभावित खेल १० ओभरमा झारिएको थियो ।
टस हारेर ब्याटिङ गरेको नेपालले पुरै १० ओभर खेल्दै ८ विकेट गुमाएर १०४ रन बनायो । युएईले ८ विकेट गुमाएर ९० रन मात्र जोड्न सक्यो । खेलपछि कप्तान पारसले समेत माने, ‘यति रन बन्ला भन्ने सोचेको नि थिएन ।’
ऐतिहासिक सिरिजका नायकहरु :
रोहित कुमार पौडेल :
रोहित कुमार पौडेलले अन्तराष्ट्रिय एकदिवसीय क्रिकेटमा सर्वाधिक कम उमेरमा अर्धशतक बनाउने खेलाडीको कीर्तिमान बनाएका छन् । अन्तराष्ट्रिय एकदिवसीय क्रिकेटमा अर्धशतक पुरा गर्दा रोहित १६ बर्ष १ सय ४६ दिनका थिए ।
१५ वर्षको उमेरमा एकदिवसीय क्रिकेटमा डेब्यु गरेका रोहितले भारतीय लिजेण्ड सचिन तेन्दुलकर र पाकिस्तानका साहिद अफ्रिदीको कीर्तिमानलाई भंग गरे । यसअघि तेन्दुलकरले १६ बर्ष २ सय १३ दिनको हुँदा टेस्ट क्रिकेटमा अर्धशतक बनाएका थिए । अफ्रिदीले १६ बर्ष २ सय १७ दिन हुँदा एकदिवसीय क्रिकेटमा अर्धशतक बनाएका थिए ।
सन्दीप जोरा :
सन्दीप जोराले अन्तराष्ट्रिय टी–ट्वान्टीको डेब्यु खेलमै अर्धशतक बनाए । सन्दीप डेब्यु खेलमा अर्धशतक बनाउने विश्वकै कान्छा खेलाडी बने । उनले नटआउट ४६ बलमा ५३ रनको योगदान गरे । तेस्रो खेलमा समेत निकै आक्रमक पाली खेल्दै उनले ११ बलमा ३ छक्काको मद्यतले २८ रन बनाए । उनी तीन खेलबाट टी–ट्वान्टी सिरिजमा सर्वाधिक ८२ रन बनाए ।
सोमपाल कामी :
युएईविरुद्धको दोस्रो एकदिवसीय क्रिकेटमा नेपाललाई शानदार जित दिलाउन उत्कृष्ट प्रदर्शन गरेका सोमपाल कामीले किफायती बलिङ गर्दै ५ विकेट लिए । एकदिवसीय अन्तराष्ट्रिय क्रिकेटको एकै खेलमा ५ विकेट लिने उनी पहिलो नेपाली बलर बनेका छन् । सोमपालले दोस्रो एकदिवसीय क्रिकेटमा ६ ओभर ३ बल बलिङ गर्दै ३३ रन खर्चिएर पाँच विकेट लिएका हुन् ।
पारस खड्का :
नेपाललाई ऐतिहासिक एकदिवसीय अन्तराष्ट्रिय सिरिज दिलाउन अन्तिम खेलमा कप्तान पारस खड्काले सतकीय पाली खेले । कप्तान खड्का एकदिवसीय अन्तराष्ट्रिय क्रिकेटमा सतक बनाउने पहिलो नेपाली खेलाडी हुन् ।
कप्तान पारस एकदिवसीय अन्तराष्ट्रिय क्रिकेटमा सर्वाधिक धेरै रन जोड्ने नेपाली खेलाडी बनेका छन् । एक दिवसीयमा ‘प्लेयर अफ दि सिरिज’ घोषित भएका खड्काले ३ खेलमा ४ विकेट लिएका थिए र सर्वाधिक १ सय ५६ रन जोडेका थिए । सिरिज अबधिभर उनले ६ खेलमा २ सय ६ रन बनाउँदै ४ विकेट लिन सफल रहे ।
कस्को प्रर्दशन कस्तो ?
करण केसी :
करणले तीन एकदिवसीय क्रिकेटको दुई पालीमा २१ रन बनाए । ५ विकेट लिए । उनले तीन टी–ट्वान्टीमा ३४ रन बनाए र ४ विकेट लिदै औसत प्रर्दशन गरे । अन्तिम टी–ट्वान्टीमा उनी म्यान अफ द म्याच घोषत भए ।
अबिनास बोहरा :
टी–ट्वान्टीमा डेब्यु गर्दै तीन खेलमा नेपालका तर्फबाट सर्वाधिक ६ विकेट लिएका उनी ‘प्लेयर अफ दि सिरिज’ घोषित भए ।
पवन सर्राफ :
पहिलो एक दिवसीय अन्तराष्ट्रिय खेलमा डेब्यु गरेका पवनले ४ रन मात्र बनाउन सके । दोश्रो खेलमा दोहोरो अंक समेत छुन सकेनन् । दोश्रो टी–ट्वान्टीमा नाजुक अवस्थामा रहेको ईनिङ्सलाई उकास्न उनले दिपेन्द्र सिंह ऐरीसंग मिलेर ५५ रनको साझेदारी गरेका थिए ।
ज्ञानेन्द्र मल्ल :
उपकप्तान ज्ञानेन्द्रले तीन एकदिवसीयमा ७५ रन बनाउन सफल रहे । उनले तीन टि–ट्वान्टी खेलमा २५ रन बनाए ।
दिपेन्द्र सिंह ऐरी :
दिपेन्द्रले तीन एकदिवसीयमा १० रन मात्र बनाए । दोश्रो टी ट्वान्टी खेल जिताउन पवनसंग ५५ रनको महत्वपुर्ण साझेदारी गरेका थिए ।
बिनोद भण्डारी :
बिनोद तीन एकदिवसीयमा ३५ रन मात्र बनाए । उनले टी–ट्वान्टीको एक खेलमा २१ रन बनाए ।
सन्दीप लामीछान :
तीन टी–ट्वान्टी खेलमा ५ विकेट लिएका सन्दिपले एकदिवसीय सिरिजमा ७ विकेट लिन सफल भए ।
बसन्त रेग्मी :
बसन्तले एक एकदिवसीय र एक टी–ट्वान्टी खेले । एकदिवसीयमा विकेट बिहिन रहे तर टी–ट्वान्टीमा २ विकेट लिन सफल रहे ।
आरिफ शेख :
आरिफले तीन एकदिवसीय खेल मात्र खेले । उनी ७५ रन बनाउन सफल रहे ।
ललित नारायण राजवंशी :
उनले दुई टी–ट्वान्टी र तीन एकदिवसीय खेले । एकदिवसीयमा एक पालीमात्र बलिङ गर्दै विकेट विहिन रहे तर दुई इनिङ्समा ५८ रन बनाउन सफल रहे । दुई टी–ट्वान्टीमा उनी २ विकेट लिन सफल रहे ।
सन्दीप जोरा :
सन्दिपले अन्तिम एकदिवसीय खेलमा डेब्यु गर्दै १९ रन बनाए । तीनवटै टी–ट्वान्टी खेलेका उनले ८२ रनको योगदान दिए ।
रोहित कुमार पौडेल :
पौडेलले दुई एकदिवसीय र एक टि–ट्वान्टी खेले । एकदिवसीय सिरिजमा ७१ जोड्दा एक टी–ट्वान्टीमा ४ रन बनाए ।
प्रदीप ऐरी :
दुई टी–ट्वान्टी खेलेका उनी ८ रन मात्र बनाएर असफल रहे ।
युवा खेलाडीको बर्चस्व रहेको नेपाली टोलीमा डेब्यु गरेका खेलाडीले निकै परिपक्क खेले प्रर्दशन गरे । नेपालको ऐतिहासिक सिरिजमा उनै युवा खेलाडी नायक रहे ।
नेपाली ब्याटिङको मेरुदण्ड भनिने शरद भेषवाकरबिना नेपाली टिम युएई भ्रमणमा निस्किएको थियो । तर युवा खेलाडीले उनलाई सम्झिने कुनै मौकानै दिएनन् ।
