काठमाडौं । संयुक्त अरब इमिरेट्स (युएई) भ्रमणमा रहेको नेपाली टोलीले आज (आइतबार) अन्तिम तथा निर्णायक टी–ट्वान्टी खेल्दैछ । खेल नेपाली समय अनुसार दिउँसो पौने ३ बजे सुरु हुनेछ ।
घरेलु टोलीविरुद्धको तीन खेलको टी–ट्वान्टी सिरिज १–१ को अवस्थामा छ ।
पहिलो खेलमा नेपाल २१ रनले पराजित भएको थियो । दोश्रोमा ४ विकेटको जित निकाल्दै नेपालले सिरिज बराबरी गर्न सफल भएको थियो ।
अन्तिम खेल जित्दै नेपाल अर्को इतिहास रच्ने लक्ष्यमा छ । नेपाल पहिलो अन्तराष्ट्रिय टी–ट्वान्टी सिरिज जित्न मात्र एक खेलले पछाडी छ ।
टी–ट्वान्टी सिरिज अगाडी नेपालले युएईविरुद्ध ३ खेलको एक दिवसिय सिरिज २–१ ले कब्जा गरेको थियो ।
युएईसंगको सिरिजका लागि ४ नयाँ अनुहारलाई नेपालले टिममा समावेश गरेको थियो । सन्दिप जोरा, अभिनास बोहोरा, पवन सर्राफ र भिम सार्की नयाँ अनुहारका रुपमा रहेका थिए ।
चार नयाँ अनुहार मध्य तीन जनाले टी ट्वान्टीमा डेब्यु गरिसकेका छन् । भीम सार्की परिक्षण हुन पाएका छैनन् । सन्दिप र पवनले एक दिवसीय सिरिजमा मौका पाएका थिए भने अभिनासले पहिलो टी–ट्वान्टीमा डेब्यु गरेका थिए ।
सन्दीप जोराले डेब्यु खेलमै कीर्तिमानी अर्धशतक बनाएका थिए । सो खेलसंगै जोरा डेब्यु खेलमा अर्धशतक बनाउने विश्वकै कान्छा खेलाडी बनेका छन् । सन्दीपले १७ वर्ष १ सय ३ दिनमा डेब्यु गर्दै ४२ बलमा ५० रन पुरा गरेका हुन् ।
पवनले भने दोश्रो टी ट्वान्टीमा दिपेन्द्र सिंह ऐरीसंग ५५ रनको साझेदारी गर्दै नेपालको जितको आधार तयार गरेका थिए । अभिनासले पहिलो टी–ट्वान्टीको डेब्यु खेलमा १ विकेट तथा दोश्रो खेलामा ३ विकेट लिदै आफ्नो रवाफ जमाउन सफल भएका थिए ।
के अब पालो भीम सार्कीको हो त ?
१७ बर्षे भीम मध्यक्रमका दायाँ हाते ब्याट्सम्यान हुन् । घरेलु प्रतियोगितामा इपीएलमा चितवन टाइगर्स तथा पीपीएलमा बुटवल ब्लास्टर्सबाट उनले खेलेका थिए । पीपीएलको पहिलो संस्करणमा उनले बुटवल ब्लास्टर्सबाट निकै राम्रो प्रर्दशन गरेका थिए । उनले ५ खेलमा २ अर्धशतक सहित १ सय २३ रन बनाएका थिए ।
काठमाडौंमा भर्खरै सकिएको ईपीएलमा चितवन टाइगर्सबाट उनले सम्झन लायक प्रदर्शन गर्न सकेनन् । उनले ६ खेलमा मात्र ३७ रन बनाएका थिए । उनले २०१८ सेप्टेम्बरमा भारतमा भएको यु–१९ सिरिजमा भारतको ए र बी टिम तथा अफगानिस्तानको यु–१९ विरुद्व नेपालको तर्फबाट ४ खेलमा ८७ रन बनाएका थिए । उनी नेपालको यु–१९ टिमका नियमित सदस्य हुन् ।
युएईको सिरिजमा हरेक खेलमा छुट्टाछुटै ब्याट्सम्यानले आफुलाई प्रमाणित गरिरहदाँ भीमले कसको स्थानमा मौका पाउलान ? कौतुहलताको बिषय छ ।
नेपाली टोली आफ्नो पहिलो टी–ट्वान्टी सिरिज जित्ने लक्ष्य सहित मैदान उत्रदै गर्दा भीमलाई लिएर जोखिम नउठाउने सम्भावना समेत उत्तिकै छ । उनी मध्यक्रममा व्याटिङ गर्ने भएकाले दिपेन्द्र सिंह ऐरी वा सन्दिप जोराको स्थानमा राख्नुपर्ने हुन्छ । तर दुवै ब्याट्सम्यान फर्ममा भएकाले भीमले टी ट्वान्टीमा डेब्यु गर्ने सम्भावना कम देखिन्छ ।
को को पार्लान त प्रमुख ११ ?
अघिल्ला दुई खेलमा जम्न नसकेका प्रदिप सिंह ऐरीको स्थानमा बिनोद भण्डारीले मौका पाउन सक्नेछन् । प्रदिपले दुई खेलमा मात्र ८ रन बनाएका छन् । पहिलो खेलमा उनी गोल्डेन डकआउट भएका थिए ।
अर्का स्पिनर ललित नारायण राजवंशीको स्थानमा अनुभवी बसन्त रेग्मी फर्कन सक्नेछन् । बसन्त नेपालका लागि टी–ट्वान्टीमा सबै भन्दा धेरै विकेट लिने खेलाडी हुन् । उनले पहिलो टी–ट्वान्टीमा ४ ओभर बलिङ गर्दै २ विकेट लिन २३ रन खर्चेका थिए । दोश्रो खेलमा ललितले ३ ओभर बलिङ गर्दै १७ रन खर्चेर विकेट विहिन भएका थिए ।
सम्भावित ११ खेलाडी सुचि : पारस खड्का, बिनोद भण्डारी, ज्ञानेन्द्र मल्ल, दिपेन्द्र सिंह ऐरी, सन्दिप जोरा, रोहितकुमार पौडेल, सोमपाल कामी, करन केसी, बसन्त रेग्मी, अभिनास बोहोरा र सन्दीप लामिछाने ।
