काठमाडौं । टिभिएस एभरेष्ट प्रिमियर लिग (ईपीएल) टी-ट्वान्टी क्रिकेटको पहिलो क्वालिफायरमा आज ललितपुर प्याट्रियट्स र काठमाडौं किङस इलाभेनले प्रतिस्पर्धा गर्दैछन् ।
टियु क्रिकेट मैदानमा ललितपुरले टस जितेको छ र पहिले फिल्डिङ रोजेको छ । ललितपुरले फिल्डिङ रोजेपछि काठमाडौंले केहि बेरमा ब्याटिङ थाल्नेछ ।
आज ललितपुर र काठमाडौं फाइनल पुग्ने लक्ष्यसहित मैदान उत्रदै छन् । फाइनल प्रवेशका लागि दुवै टोलीले आफ्नो सम्पूर्ण अस्त्र प्रयोग गर्नेछ ।
जारी लिगमा ज्ञानेन्द्र मल्लको कप्तानीमा रहेको ललितपुर शीर्ष स्थानमा रहदै क्वालिफायरमा पुगेको हो । ललितपुरले पाँच खेलमा ८ अंक जोड्यो । पहिलो खेल गुमाएपनि ललितपुरले लगातार चार खेल जितेको थियो । र, ललितपुर उक्त जितको लयलाई कायम राख्ने लक्ष्यमा हुनेछ ।
यता, रोहन मुस्तफाको कप्तानीमा मैदान उत्रने काठमाडौंले पाँच खेलमा ८ अंक जोडेर दोस्रो स्थानमा रहदै क्वालिफायरको यात्रा तय गरेको हो । जारी लिगमा काठमाडौं लिग चरणमा ललितपुरसंगै पराजित भएको थियो । काठमाडौंलाई आज लिग चरणको हारको बदला लिने अवसर समेत रहेको छ ।
ईपीएलको नियम अनुसार शीर्ष दुई टोलीले क्वालिफायरमा स्थान बनाउने छन् । जस अन्तर्गत ललितपुर र काठमाडौंबीचको विजेता सिधै फाइनलमा पुग्नेछ । पराजित हुने टोलीले भने दोस्रो क्वालिफायर खेल्ने मौका पाउने छ ।
यस खेलमा पराजित हुने टोलीले फाइनल प्रवेशको लागि इलिमिनेटरको विजेतासंग खेल्नेछ । बुधबार हुने इलिमिनेटरमा भैरहवा ग्लाडीयटर्स र चितवन टाइगरबीच प्रतिस्पर्धा हुनेछ ।