काठमाडौं । किर्तिपुरस्थित टियु क्रिकेट मैदानमा घरेलु क्रिकेटको कुम्भमेला टिभिएस एभरेष्ट प्रिमियर लिग (ईपीएल) टी–ट्वान्टी क्रिकेट चलिरहेको छ ।
विभिन्न ६ फ्रेन्चाईज टोलीले प्रतिस्पर्धा गरिरहेको ईपीएलको प्ले अफ समीकरण तय भईसकेको छ । शीर्ष चार टोलीले प्ले अफमा स्थान बनाउदा दुई पुछारका टोली भने प्रतियोगिताबाट बाहिरिसकेको छ ।
यस्तोमा, खेलहरु कम हुँदै जादा ईपीएलको रोमान्चकता भने बढ्दै गएको छ । जसको कारण दैनिक समर्थकहरु क्रिकेट हेर्न टियु मैदान आईरहेका छन् । आ-आफ्नो क्लबलाई समर्थन गरिरहेका छन् ।
टियु आउने समर्थकहरुलाई खेल हेर्ने लोभ र मनोरंजनले मात्र तानेको छैन् । नेपाली क्रिकेट प्रतिको माया र मोहले तानेको छ । नेपाली क्रिकेटको विकासमा समर्थकहरुको भूमिका अहम छ भन्ने गरिन्छ । अन्तर्राष्ट्रिय क्रिकेट परिषद (आईसीसी) को प्रतिबन्धको बाबजुत नेपालमा ठुला प्रतियोगिता हुँदा समर्थकहरु पनि खुसीले दङ्ग छन् ।
ईपीएल क्रिकेटका लागि राजेश दोङले अफिसमा चार दिनको बिदा नै लिएका छन् । एक गैरसरकारी संस्थामा कार्यरत दोङलाई नेपालमा भईरहेको ठुलो प्रतियोगिता छुटाउनु ठुलो भुल लाग्छ ।
'म अफिसको काम राति गर्ने गर्छु तर, यति ठुलो प्रतियोगितालाई गुमाउन चाहन्न,' दोङ भन्छन् ।
बंगलादेशकी आरिशा घोसा कीर्तिपुर अस्पतालमा कार्यरत छिन् । उनलाई क्रिकेट मन पर्छ । त्यसैले रातिको ड्युटी परेको दिन सधै टियु मैदान आईपुग्छिन् । क्रिकेटमा रमाईरहेकी हुन्छिन् ।
'क्रिकेट धेरै मन पर्छ । डे (दिउसो) ड्युटी नभएको समय क्रिकेट हेर्न आउने गर्छु,' उनी भन्छिन् । पाउल स्टर्लिङको कट्टर समर्थक रहेकी उनी ईपीएलमा चितवन टाइगर्सलाई समर्थन गर्छिन् ।
ईपीएलमा समर्थकहरुलाई अनेक कारणले लोभ्याएको छ । कतिपय विदेशी खेलाडीको खेल हेर्न आएका छन् त कतिपय नेपाली क्रिकेटरलाई साथ दिन । कतिलाई चियर लिडर्सको मनोरन्जनले तानेको छ । यस्तै समर्थकलाई ब्याट्सम्यानले हानेको छक्का एक हातले क्याच गरे ५० हजार पाउने अवसर पनि छ ।
कीर्तिपुरमा बस्ने विशाल आचार्यलाई भने चियर लिडर्सको कारण ईपीएल हेर्न आउन बाध्य बनायो । इण्डियन प्रिमियर लिग (आईपीएल) को दौरान टेलिभिजनमा देखेका चियर लिडर्स प्रत्यक्ष देख्न पाउने मौका उनले गुमाउन चाहेनन् ।
'साथीले फोन गरेर क्रिकेट हेर्न जाउ भन्दा मलाई आउन मन लागेको थिएन्,' आचार्यले भने, 'तर, ईपीएलमा चियर लिडर्स हुने जानकारी भएपछि म यहाँ आउँन तयार भए ।' उनलाई खेलको दौरान चियर लिडर्सले प्रदान गर्ने मनोरन्जन रमाइलो लाग्छ ।
बानेश्वर बस्ने रविन श्रेष्ठ र उमंग श्रेष्ठ दाजु भाई हुन् । दुवै नेपाली क्रिकेटका समर्थक हुन् । ईपीएल हेर्न दुवै संगै आउछन् संगै घर फर्किन्छन् । रविन भैरहवा ग्लाडीयटर्सका कप्तान शरद भेषावकरका समर्थक हुन् । उमंग चितवन टाइगर्सका दिपेन्द्र सिंह ऐरीका समर्थक हुन् ।
४५ बर्षिय व्यवसायी राजन पौड्याल कामको बाबजुत दैनिक टियु क्रिकेट मैदान पुग्छन् । क्रिकेट विकासमा सहयोग पुर्याउने लक्ष्यसहित उनी ईपीएल हेर्न मैदान पुग्ने गर्छन् ।
नेपालमा भईरहेको ठुलो प्रतियोगितालाई समर्थन गर्नुपर्ने पौडेलको बुझाई छ । उनि भन्छन्, 'आफ्नो व्यवसायको काम भएतापनि समय मिलाएर दैनिक एक पटक ईपीएल हेर्न आउने गर्छु । क्रिकेट विकासमा हामी समर्थकहरुले पनि सहयोग गर्नुपर्छ ।'
क्रिकेट खेलेरै हुर्किएका पौडेललाई आफ्नो पालामा यस्ता प्रतियोगिता नभएको अहिले थकथकी लाग्छ ।
