काठमाडौं । दोस्रो एकदिवसीय खेलमा घरेलु टोली बंगलादेशले भारतलाई २ सय ७२ रनको लक्ष्य दिएको छ ।
शेरे बंगला नेशनल स्टेडियममा टस जितेर पहिले ब्याटिङ गरेको घरेलु टोलीले ५० ओभरमा ७ विकेट गुमाएर २ सय ७१ रन बनाएको हो ।
घरेलु टोलीका लागि मेहेदी हसनले ८३ बलमा ८ चौका र ४ छक्काको सहयोगमा अविजित १०० रनको शतकीय ईनिङ खेले । मेहमदुल्लाहले ९६ बलमा ७ चौकाको सहयोगमा ७७ रन बनाए ।
नजमल हसन शान्तोले २१ तथा नसुम अहमदले अविजित १८ रन बनाए । मुस्फिकुर रहिमले १२ तथा अनामुल हकले ११ रन बनाए । भारतले १७ रन अतिरिक्तका स्वरुपमा खर्चियो ।
भ्रमणकारी टोलीका लागि वासिङ्टन सुन्दरले ३ तथा मोहम्मद सिराज र उमरान मल्लिकले समान २/२ विकेट लिए ।
तीन खेलको एकदिवसीय सिरिजको पहिलो खेलमा घरेलु टोलीले १ विकेटको रोमान्चक जित हासिल गरेको छ । सिरिज एक खेल अगावै जित्न बंगलादेश जितको खोजीमा रहेको छ ।
भारत यस सिरिजमा जिवित रहिरहन आजको खेल जित्नै पर्ने बाध्यतामा रहेको छ ।